Saúlwan Samuel tinkuyanqan
9
Benjamín trïbupitami Cis jutiyuq respitashqa runa karqan. Cispa taytanmi karqan Abiel y Abielpa taytanmi karqan Zeror. Zerorpa taytanmi karqan Becorat y Becoratpa taytannami karqan Afía. 2 Cispa tsurin Saúlmi kuyayllapä jövin karqan. Paynö kuyayllapäqa Israel runakunacho manami pipis karqantsu. Jatun kaptinmi wakin runakuna umrullanman chäyaq.3 Jukpin Cispa ashnunkuna oqrakaskiptinmi tsurin Saúlta nirqan: “Juk wätaynintsikta pushakurkur ashnuntsikkuna ashiq ayway”.
4 Tsaymi ashnunkuna ashiq Saúl aywarqan. Efraín jallqakunapa ashirmi Salisa ninqan jallqaman chäyarqan. Tsaychöpis mana tarirmi Saalim partipa y Benjamín trïbu runakuna täyanqan partipapis ashiyarqan. Tsaychöpis manami tariyarqantsu. 5 Zuf partiman chaykurmi wätayninta nirqan: “Kaypitaqa kutikushunna. Ashnukunapä llakikunanpa trokinqa noqantsikpänachi taytäqa llakikuykan”.
6 Tsaynö niptinmi wätaynin nirqan: “Kay markacho kanmi Tayta Diospa profëtan. Imapis päsananpä niptinqa ninqannöllami päsan. Tsaymi pïmaypis payta respitayan. Tapukushqaqa capazchi nimäshun maypa ashiq aywanantsikpäpis”.
7 Tsaynö niptinmi Saúl nirqan: “Tsaynö kaptinqa aku aywashun. Itsanqa mirkapa apamunqantsik tantapis ushakaykashqanachä. ¿Imallantsikwanrä payman chäshun?”
8 Tsaymi sirviqnin nirqan: “Taksha yuraq qellaytami tsararaykä. Tsaytachi pägashun maypa ashiq aywanapäpis willamänantsikpä”.
9 (Unayqa profëtapämi Israel runakuna willakuq niyaq. Tsaymi imapis kaptin Tayta Diosta tapukuyta munarqa “willamänantsikpä willakuqman aywashun” niyaq.)
10 Tsaymi sirviqninta Saúl nirqan: “Pay kaqman ras aywashun”.
Tsaynö nirmi Tayta Diospa profëtan kaqman aywayarqan.
11 Markaman witsaykarmi yakukuq aywaykaq jipashkunawan tinkuyarqan. Tsaymi paykunata tapukur niyarqan: “¿Tsaychötsurä profëta kaykan?” nir.
12 Jipashkunanami niyarqan: “¡Awmi! Tsayrämi chämushqa. Ras aywayay. Sacrificiuta rurananpämi runakuna qayatsiyashqa. Altar kaqman witsänanpänami kaykan. 13 Tsaychömi llapan runakunawan sacrificiuta mikuyanqa. Manarä mikuq aywaptin ras ashiyay. Pay manarä chaptinqa manami runakuna mikuyanqarätsu. Payrämi runakuna mikuyänanpä Tayta Diosta mañakunqa. Ras aywarqa manarä yarquqtami tariyanki”.
14 Tsaynö niyaptinmi markaman empëñu witsar Samuelwan tinkuyarqan. Payqa altarman mikuqnami aywaykarqan.
15 Tsay markaman Saúl chänanpä juk junaq pishiykaptinmi Samuelta Tayta Dios nishqa karqan: 16 “Israel runakuna pasaypa ñakayanqanta rikarmi mandaqnin rey kananpä mañakayämanqanta awnishqä. Tsaymi waray junaq kaynö höra qam kaqman Benjamín trïbu runa chämunqa. Paypa umanman aceitita wiñanki kuyanqä Israel runakunapa mandaqnin rey kananpä. Paymi Israel runakunata salvanqa filisteo runakunapa munaynincho ñakayanqanpita”.
17 Saúl chaykuptinmi Samuelta Tayta Dios nirqan: “Taqay runa rey kananpämi qamta nirqä. Paymi Israel nacionpa mandaqnin rey kanqa”.
18 Tsay hörami tsay marka yaykunacho Samuel kaqman witiykur Saúl nirqan: “Taytay, tapukulläshayki. ¿Maychötä profëtapa wayin?”
19 Tsaynö niptinmi Samuel nirqan: “Ashiykanqayki profëta noqami kä. Kananqa altar kaqman mikuq aywashun. Waray tutanami llapan tapukamanqaykita willaykuptï aywakunki. 20 Kimsa junaqna ashiyanqayki ashnuykikunapä amana llakikuyaynatsu. Tsay ashnuykikunataqa tariyashqanami. Jukta willashayki. Kananpitaqa Israel runakunapa llapan imaykankunapis qampä y castaykikunapänami kanqa”.
21 Tsaynö niptinmi Saúl nirqan: “Noqaqa Benjamín trïbullapitami kä. Tsaynöpis tsay trïbuqa llapan Israel trïbukunapitapis mas wallkallami kaykan. Benjamín trïbucho castäpis manakaqllami kaykan. Tsaynö kaykaptinqa ¿imanirtä tsaynö nimanki?”
22 Tsaypitanami mikuyänanpä kaq jatun cuartuman Saúlta y sirviqninta pushaykur autoridäkuna jamakuyänanman Samuel jamatsirqan. Tsaychömi kimsa chunkanö (30) qayatsinqan runakuna kaykäyarqan. 23 Jamaskiyaptinnami kusinakuqta Samuel nirqan: “Churanaykipä ninqä allin kaq prësata apamuy”.
24 Tsaynö niptinmi kusinakuq runa juk entëru chankanta apaskamur Saúlta churapurqan. Churapuskiptinmi Samuel nirqan: “Taytay, mikurkullay. Kay runakunata manarä qayatsimurmi kay aytsata qampä churatsirqä”.
Tsaynö niptinmi paykunawan Saúl mikurqan.
25 Mikunqanpita wayinman kutiskirnami wayi jananchoa qorpa punukunan kaq cuartucho Saúlpä cämata kamarirqan. 26 Tsaymi tsay paqas Saúl tsaycho punurqan. Waraynin tutanami qayakur Samuel nirqan: “Shärikuyna markaykipa kutikunaykipä”.
Tsaynö niptinmi Saúl shärikurqan aywakunanpä. Aywakuptinnami Samuelpis paywan juntu aywarqan markapita yarqunqanyaq. 27 Marka yarqunaman chaykurnami Samuel nirqan: “Sirvishuqniki puntaykätsun. Qamqa ichik shuyaskiyrä Tayta Dios nimanqankunata willanäpä”.
Puntakunanpä niptinmi sirviqnin puntarqan.