4 Tsaynö kayaptinmi Israel mayor runakuna Ramáman aywaykur Samuelta 5 niyarqan: “Qamqa awkinnami kanki y tsurikikunaqa manami kikikinötsu runakuna quejakuyanqanta arreglayan. Wakin nacionkunacho rey kanqannö nacionnintsikchöpis rey kananpä churapaykayällämay”.^†

6 Tsaynö niyaptinmi Samuelqa llakikur Tayta Diosta mañakurqan paykuna niyanqanta rurananpä o mana rurananpä kanqantapis tantiyatsinanpä. 7 Tsaymi Samuelta Tayta Dios nirqan: “Paykuna mañakuyäshunqaykinö reyta churay. Manakaqman churayäshunqaykita yarpar ama qallayaytsu. Juk reyta mañakuyäshurnikiqa noqatami manakaqman churaykäyäman. 8 Paykunaqa Egiptupita jipimunqä junaqpita patsami juk dioskunata adorar ajanätsiyämashqa. Tsaynöllami qamtapis ajanaykätsiyäshunki. 9 Paykuna mañakuyäshunqaykinölla reyta churay. Itsanqa shumaq tantiyatsiy paykunata rey ñakatsinanpä kanqanta”.

10 Tayta Dios tsaynö ninqankunatami Israel runakunata Samuel willar 11 nirqan: “Tsay mandayäshuqniki reymi tsurikikunata churanqa guërra carrëtawan pelyaq aywayänanpä, cawallun muntashqa guërraman aywayänanpä y paypa carrëtanpa ñöpanta cörriyänanpä. 12 Wakin tsurikikunatami churanqa juk waranqa (1,000) soldädukunata mandayänanpä y wakintanami churanqa pitsqa chunka (50) soldädukunata mandayänanpä. Wakintami churanqa chakranta arupäyänanpä y wakintanami cosëchata qoripäyänanpä. Wakintami churanqa armata rurayänanpä y wakintanami churanqa guërra carrëtankunata rurayänanpä. 13 Warmi tsurikikunatanami churanqa perfümikunata rurayänanpä, kusinakuyänanpä y tantata masarayänanpä. 14 Churayanqayki reymi qechuyäshunki üva y olïvu plantaraykaq chakraykikunata y wakin allinnin kaq chakraykikunatapis. Tsaynö qechuyäshurnikimi yanapaqninkunata aypunqa. 15 Tsaynöllami yanapaqninkunata aypunanpä cosëchata qoriyanqaykipita tsaki mikuy o üva kaptinpis cada chunka säcupita juk säcuta apayänaykipä obligayäshunki. 16 Tsaynöpis payllatana sirvir aruyänanpämi qechuyäshunki wätaynikikunata warmita o ollquta karpis, allinnin wäkaykikunata y allinnin ashnuykikunatapis. 17 Tsaynöpis cada chunka üshaykikunapitami jukta apanqa. Kikikikunatapis munaynincho kayänaykipämi churayäshunki. 18 Mandashuqniki rey tsaynö ñakatsiyäshuptiki pasaypa llakikuyaptikipis Tayta Dios manami cäsuyäshunkitsu”.

19 Samuel tsaynö niptinpis runakunaqa manami cäsuyarqantsu. Tsaypa rantinmi niyarqan: “Imanö kaptinpis reyta churanaykitami munayä. 20 Wakin nacionkunapa mandaqnin rey kanqannö kanantami noqakunapis munayä. Paypa munayninchömi noqakuna kayäshä. Paymi guërraman aywayaptï puntäkunata aywanqa”.

21 Runakuna tsaynö niyanqanta Tayta Diosta Samuel willaptinmi 22 Tayta Dios nirqan: “Paykuna mañakuyanqannö mandaqnin reyta churay”.

Tsaynö niptinmi runakunata Samuel willarqan Tayta Dios awninqanta. Tsaypitanami markankunaman kutikuyänanpä Samuel nirqan.