2 Quiriat-jearimchömi Tayta Diospa babulnin ishkay chunka (20) wata churararqan. Filisteo runakunapa munaynincho karmi Israel runakuna llakikur Tayta Diosta mañakuyarqan yanapananpä. 3 Tsaymi Israel runakunata Samuel nirqan: “Tayta Diosta rasunpa cäsukuyta munarqa Astarot ïdulukunata y wakin ïdulukunatapis jitariskir Tayta Diosllata sirviyay. Tsaynöpami filisteo runakunapa munaynincho kanqantsikpita salvamäshun”.

4 Tsaymi Israel runakuna Baal ïdulukunata y Astarot ïdulukunatapis jitariskir Tayta Diosllatana adorayarqan.

5 Tsaypitami Samuel nirqan: “Mizpa markaman llapantsik qorikäshun. Tsaychömi qamkunapä Tayta Diosta mañakushä”.

6 Tsaynö niptinmi Israel runakuna Mizpaman qorikäyarqan. Tsaychömi mana cäsukuq kayanqanpita perdonta mañakur pukyupita yakuta wishirkur Tayta Diospä jichayarqan. Tsaynöllami qoyat ayunarnin Tayta Diosta mañakur niyarqan: “Taytay, jutsata rurayanqäpita perdonaykayällämay”.

Tsay junaqmi juez kananpä Samuelta churayarqan.

7 Israel runakuna Mizpacho qorikäyanqanta musyaskirmi filisteo runakunapa mandaqninkuna soldädunkunata qoriskir atacaq aywayarqan. Tsaynö aywayanqanta musyarmi Israel runakuna pasaypa mantsarir 8 Samuelta niyarqan: “¡Filisteo runakunapita salvamänantsikpä mana kachaypa Tayta Diosnintsikta mañakuykullay!”

9 Tsaypitami carnishta Tayta Diospä rupatsina sacrificiuta rupatsir Samuel mañakurqan Israel runakunata salvananpä. Tsaynö mañakuptinmi filisteo runakunapita Tayta Dios salvarqan.

10 Rupatsina sacrificiuta Samuel rupaykätsinqan hörami filisteo runakuna Israel runakunata atacayänanpä chäyarqan. Tsaymi ciëlupita Tayta Dios pasaypa maqakatsimuptin filisteo runakuna mantsakäyarqan. Tsaynö mantsakashqa kaykaqtami Israel runakuna atacar vinciyarqan. 11 Vincirmi filisteo runakunata qati qatiykur wanutsiyarqan Mizpapita hasta Bet-car urayyaq.

12 Tsaypitanami jatunkaray wankata Mizpa y Sen markakunapa lindërunman Samuel jawirqan. Tsay wankatami jutitsirqan Eben-ezer jutin kananpä. Jutinta tsaynö churarmi nirqan: “Kananyaqpis Tayta Dios yanapamashqantsikmi”.

13 Tsaypitaqa filisteo runakuna Israel runakunata manami atacayarqannatsu.

Samuel kawanqan witsanmi Israel runakunata Tayta Dios yanaparqan filisteo runakunata vinciyänanpä. 14 Tsaymi Ecrón y Gat cercancho markakunatapis filisteo runakunapita Israel runakuna qoriyarqan. Tsaynöllami wakin markakunatapis qoriyarqan. Tsay witsanqa Israel runakunawan amorreo runakuna achäquita mana ashipänakuyllapami kawayarqan.

15 Samuelqa hasta wanunqanyaqmi Israel runakunapa jueznin karqan. 16 Cada watami Bet-elman, Gilgalman y Mizpaman aywaq, tsaycho imapitapis quejakuyanqanta arreglananpä. 17 Tsaypitanami Ramáman kutiq, tsaycho wayin kaptin. Ramáchöpis runakuna quejakuyanqanta arreglaqmi. Tsaynöpis Tayta Diosta adorayänanpämi altarta tsaycho ruratsirqan.