3 Tsaymi niyarqan: “Israel runakunapa Diosninpa babulninta kutitsirqa ama jinayllataqa kutitsiyaytsu, tsaypa trokinqa imallatapis qarayänaykipä apayay. Babulta kutitsiyanqaykipita alliyarmi Israel runakunapa Diosnin castigayäshunqaykita musyayanki”.

4 Tsaymi filisteo runakuna tapur niyarqan: “¿Imatatä qarayäshä?”

Tapuyaptinmi niyarqan: “Mandamaqnintsik reykunawan iwal ñakaykarqa pitsqa chupu niraqta y pitsqa ukush niraqta qoripita ruraykur qarashun. Tsaynöpami mandamaqnintsik reykuna pitsqa kaptin cada reypita juk qaraynin kanqa. 5 Tsaykunata apatsiyay Israel runakunapa Diosninta respitar. Tsaynö apatsiyaptiki capazchi manana castigayäshurniki murukuynikikunatapis ushakätsinqanatsu y diosnintsikkunatapis pakinqanatsu. 6 Qamkunaqa kullu rinri ama kayaytsu. Mana wiyakuq karqa Egipto runakunanö y mandaqnin Faraónnömi kaykäyanki. Paykunaqa Israel runakunapa Diosnin pasaypa castigaptinrämi Israel runakuna aywakuyänanpä kachäyarqan.

7 “Kananqa mushuq carrëtata ruraskatsir imaypis manarä yuntashqa llullu wawayuq ishkay wäkakunata yüguskir carrëtata watarkur apatsiyay. Wawankunata itsanqa chikuyanki. 8 Nirkurna Israel runakunapa Diosninpa babulninta carrëtaman churayanki. Tsaynöpis qoripita rurayanqayki qaraykunata juk cajonman wiñarkur babulpa ñöpanman churayanki. Tsaypitana wäkakuna kikillan qarachashqa apakuyänanpä kachaykuyanki. 9 Wäkakuna aywayaptin karu qepallanta qatipäyanki maypa aywayanqantapis rikayänaykipä. Israel nacioncho Bet-semesman aywaq nänipa apaptinmi musyashun Israel runakunapa Diosnin castigaykämanqantsikta. Juk nänipa aywaptinmi itsanqa musyashun pay mana castigaykämanqantsikta, sinöqa llapanpis tsaynö päsananpä kaqkunalla päsanqanta”.

10 Sacerdötikuna tsaynö niyaptinmi wawayuq wäkakunata carrëtata qarachäyänanpä yüguyarqan. Wawankunatanami chikuyarqan. 11 Tsaypitanami Tayta Diospa babulninta carrëtaman churayarqan. Tsaynöllami qoripita ruratsiyanqan chupu niraqta y ukush niraqta cajonman wiñarkur carrëtaman churayarqan. 12 Tsaynö ruraskir qarquyaptinmi wäkakunaqa wawankunapä waqarnin maypapis mana yaqaypa carrëtan qarachashqa Bet-semesman aywaq nänipa aywayarqan. Filisteo markakunapa mandaqnin reykunanami karu qepallanta Bet-semespa lindërunyaq qatipäyarqan.

13 Bet-semes runakunanami pampacho trïguta segaykar rikachakuyanqancho rikaskiyarqan Tayta Diospa babulninta wäkakuna qarachashqa yaykaykätsiqta. Tsayta rikaykurmi pasaypa kushikuyarqan. 14 Josuépa chakrancho jatunkaray rumi kaqman chaykurmi wäkakuna ichiskiyarqan. Bet-semes runakunanami carrëtata tseqtaskir tsay wäkakunata pishtaskirnin Tayta Diosta agradëcikur sacrificiuta rupatsiyarqan. 15 Manarä rupatsirmi Leví trïbu runakuna carrëtapita jipiyarqan Tayta Diospa babulninta y cajoncho kaykaq qoripita rurashqa qaraykunatapis. Babultawan cajontami jatun rumi jananman churayarqan. Tsaymi Bet-semes runakuna Tayta Diosta adorarnin kikinkunapa uywankunatapis tsay junaq rupatsiyarqan. 16 Tsay rurayanqanta rikaykurmi filisteo runakunapa pitsqa mandaqnin reykuna tsay junaqlla Ecrón markaman kutikuyarqan.

17 Tayta Diospä qoripita rurashqa chupu niraqkuna kayarqan Asdod, Gaza, Ascalón, Gat y Ecrón markakunapa mandaqnin reykunapitami. 18 Qoripita rurashqa pitsqa ukushkunanami karqan filisteo runakunapa pitsqa murallashqa markankunapita y cercancho kaq taksha markakunapita. Tayta Diospa babulninta churanqan jatun rumiqa kananyaqmi kaykan Josuépa chakran Bet-semescho.

19 Tayta Diospa babulnin tsaycho kaptinmi wakin Bet-semes runakuna kichaskir rikayarqan. Tsaymi Tayta Dios qanchis chunka (70)^a runakunata wanutsirqan. Tsaynö wanuyaptinmi tsaycho taq runakuna pasaypa waqarnin 20 niyarqan. “Tayta Dios santu kaykaptinqa ¡pirä ñöpancho^b kawanman! Tsaynö kaptinqa ¿maymanrä babulninta apaykatsishwan?”

21 Tsaynö nirmi Quiriat-jearimman willakuqkunata kachar niyarqan: “Tayta Diospa babulninta filisteo runakuna kutitsiyämunqantashi aywar apakayämunki”.