Pactu Babulta filisteo runakuna tsararäyanqan
5
Tayta Diospa babulninta filisteo runakuna qechuskirmi Eben-ezerpita Asdod markaman apayarqan. 2 Tsaychömi Dagón jutiyuq diosninpa templunman yaykatsir Dagón ïdulupa ñöpanman churayarqan. 3 Waraynin tuta Asdod runakuna templuman kutirmi babulpa ñöpancho Dagón lätaraykaqta tariyarqan. Tsaynö tariykurmi jamaräkunanman yapay kutitsiyarqan. 4 Tsaypita waraynin tutapis Asdod runakuna kutirninmi Tayta Diospa babulninpa ñöpancho Dagón lätaraykaqta yapay tariyarqan. Umantawan makinkunatanami tariyarqan punku yaykunacho pakishqa jitaraykaqta. 5 Tsaypita patsami kananyaq Asdod sacerdötikunapis ni mayqan runapis Dagón kanqan templuman yaykur punku yaykuna quiciunta jaruyantsu.6 Tsaynöllami Asdod runakunata y ñöpan markakunacho taq runakunatapis chupu qeshyawan Tayta Dios castigarqan. 7 Tsaynö castigaptinmi Asdod runakuna niyarqan: “Israel runakunapa Diosninpa babulninta ama tsararäshunnatsu. Paykunapa Diosninmi castigaykämantsik noqantsiktapis y diosnintsik Dagóntapis”.
8 Tsaymi filisteo autoridäkunata qayaykatsir tapuyarqan: “Israel runakunapa Diosninpa babulninta ¿imanäshuntä?” nir.
Tsaynö tapuyaptinmi niyarqan: “Gat markaman apatsishun”.
Tsaynö niyaptinmi filisteo runakuna Gat markaman apayarqan. 9 Tsayman apayaptinmi tsaychöpis runakunata Tayta Dios castigarqan mantsariypä chupu qeshyawan. Tsay qeshyami wamrakunapita qallaykur hasta awkinkunayaq usharqan.
10 Tsaymi Tayta Diospa babulninta Ecrón markamanna apayarqan. Chaykatsiyaptinmi tsaycho taq runakuna pasaypa mantsarir niyarqan: “¡Kayrächi kayllaqa! ¿Imapärä Israel runakunapa Diosninpa babulninta apamushqantsik? ¡Kananqa llapantsiktami ushakätsimäshun!”
11 Tsay markachöpis Tayta Dios castigaptinmi runakuna pasaypa mantsariyarqan. Tsaymi Ecrón runakuna filisteo autoridäkunata qayaykatsir niyarqan: “Israel runakunapa Diosninpa babulninta Israelman ras kutitsiyay. Mana kutitsiyaptikiqa llapantsikmi ushakäshun”.
12 Mana wanuqkunami entëru cuerpuncho chupu yuriptin pasaypa nanaywan qayarar waqayarqan.