Tsay witsanmi Israel runakuna filisteo runakunawan pelyayänanpä Eben-ezer cercancho campamentunkuna rurayarqan. Filisteo soldädukunanami Afecman aywaykur campamentunkuna rurayarqan. 2 Tsaychömi filisteo soldädukuna atacarnin Israel runakunata vincir chusku waranqatanö (4,000) wanutsiyarqan. 3 Israel runakuna pelyayanqanpita campamentunkunaman kutiyaptinmi mayor runakuna niyarqan: “¿Imanirtä Tayta Dios munashqa filisteo runakuna vincimänantsikta? Yapay mana vincimänantsikpä Tayta Diospa Pactu Babulninta Silo markapita apamushun. Tsaynöpami Tayta Dios noqantsikwan kar contrantsikkunata vincinantsikpä yanapamäshun”.

4 Tsaymi runakunata kachayarqan llapanta mandaq Tayta Diospa Pactu Babulninta Silupita apayämunanpä. Babul janancho kaykaq ishkay querubín chawpinchömi Tayta Diospa trönun kaykan.^† Pactu Babulta apayämuptinmi Elípa tsurinkuna Ofni y Fineespis wallkir aywayarqan. 5 Tayta Diospa Pactu Babulninta campamentuman chaykatsiyaptinmi Israel runakuna kushikuypita pasaypa qayaräyarqan qaqakunapis yachapanqanyaq.

6 Tsaynö qayaräyanqanta wiyarmi filisteo soldädukuna niyarqan: “Hebreo runakuna campamentunkunacho ¿imanirtä pasaypa büllata ruraykäyan?”

Tayta Diospa babulninta campamentuman chätsiyanqanta musyaskirmi 7 filisteo runakuna pasaypa mantsarir niyarqan: “¡Kayrächi kayllaqa! ¡Israel runakunapa Diosninmi campamentunkunaman chashqa! Kananqa ¡imanörä kaykulläshun! ¡Israel runakunapa Diosnin manami imaypis shamushqatsu contrantsik pelyananpä! 8 ¿Imanöparä munayyuq Diosninpa makinpita qeshpiykulläshun? Paymi imaykaläya desgraciawan Egipto runakunatapis tsunyaq jirkacho ushakätsirqan. 9 Taytakuna, tsaynö kaptinpis kallpata tsarir mana mantsariypa pelyashun. Paykunata mana vincishqaqa mananami wätaynintsiknatsu kayanqa, tsaypa trokinqa noqantsiknami paykunapa wätayninkuna kashun. Tsaynö mana kanantsikpä tseqllantsikta chachak wachakakurkur pelyashun”.

10 Filisteo soldädukuna vinciyaptinmi Israel runakuna campamentunkunaman qeshpir kutikuyarqan. Tsay pelyachömi Israel runakunata filisteo soldädukuna wanutsiyarqan kimsa chunka waranqa (30,000) soldädukunata. 11 Vinciskirmi Tayta Diospa babulninta filisteo runakuna qechuskir Elípa tsurinkunata Ofnita y Fineesta wanutsiyarqan.

12 Benjamín trïbupita juk runa pelyapita qeshpirmi tsay junaqlla Silo markayaq charqan.^a Paymi pasaypa llakikurnin latsapanpis rachishqa y umanpis allpallana charqan. 13 Chänanpämi Elíqa nänipa rikachakurnin Tayta Diospa babulninpä pasaypa llakikurnin jamaraykarqan. Markaman tsay runa chaykur pelyacho ima päsanqantapis willaptinmi llapankuna qayarayparä waqayarqan. 14 Waqaykäyanqanta wiyarmi Elí tapurqan: “¿Imanirtä runakuna waqaykäyan?”

Tsaynami tsay aywaq runa ima päsanqantapis willananpä Elíman ras aywarqan. 15 Tsay witsanqa isqun chunka puwaq (98) watayuqnami Elí kaykarqan. Ñawin tsakaptinmi reqikurqannatsu. 16 Tsay runa chaykurmi Elíta nirqan: “Pelyayanqanpita qeshpimurmi kanan junaqlla chämushqä”.

Tsaynö niptinmi Elí tapurqan: “Hïju, tsay pelyacho ¿imatä päsashqa?”

17 Tsay runanami willar nirqan: “Filisteo runakuna atacar tsaytsikaqta wanutsiyaptinmi Israel runakuna qeshpir aywakuyashqa. Ofnitawan Fineestapis wanutsiyashqami. Tayta Diospa babulnintapis qechuskirmi apakuyashqa”.

18 Tayta Diospa babulninta apakuyanqanta willaptinmi sillëtacho Elí jamaraykanqanpita punku ñöpanman tsakakaypa ankallaskirqan. Awkinna karmi cuerpun pasaypa lasaptin kunkanpis pakiqpä kumllikaskir jinan höra wanuskirqan. Paymi Israel runakunapa jueznin karqan chusku chunka (40) wata.

19 Tsaychömi tsurin Fineespa warminpis qeshyakunanpä killan tinkushqana kaykarqan. Tsaymi Tayta Diospa babulninta apakuyanqanta y suegrunpis y runanpis wanunqanta wiyaykuptin jinan höra nanay tsariskirqan. Nanaywan qoshpaykaptinmi wamranpis yuriskirqan. 20 Fineespa warmin wanuykaqtana rikarmi partërakuna niyarqan: “Ama mantsariytsu. Ollqu wamratami qeshyakushqayki”.

Tsaynö niyaptinpis manami imatapis parlarqannatsu.

21 Manarä wanurmi tsay yuriq wamranta jutitsirqan Icabod jutin kananpä. Icabod ninanqa Tayta Diosmi kacharimashqantsik ninanmi. Jutinta tsaynö churaparqan Tayta Diospa babulninta apakuyanqanpita y runanwan suegrun wanuyanqanpitami. 22 Tsaypitanami nirqan: “¡Israel runakunatami Tayta Dios kacharishqa! ¡Tayta Diospa babulnintami filisteo runakuna apakuyashqa!”