2 Is-bosetmi runakunata asaltayänanpä asaltantikunata imaypis kachaq. Tsay asaltantikunapa mandaqninkunami Baana y Recab kayarqan. Paykunaqa Beerot markacho taq Rimónpa tsurinkunami kayarqan. Beerot markaqa Benjamín trïbu runakuna täyanqanchömi kaykan. 3 Benjamín trïbu runakuna manarä tsaycho täyaptinmi tsaycho taq cananeo runakuna qeshpir Gitaim markaman aywakuyarqan. Tsaychömi tsay runakuna kananyaq taykäyan.

4 Saúlpa tsurin Jonatánpami juk tsurin Mefi-boset karqan. Mefi-boset pitsqa watayuq kaykaptinmi taytan Jonatánta y awilun Saúlta Jezreel markacho filisteo runakuna wanutsiyarqan. Tsayta musyaykur wätaqnin warmi Mefi-bosetta aparikurkur qeshpiykätsiptinmi chakinkuna moqaqpä wamra ishkiskirqan. Tsay junaqpitami ishkan chakin wishtuyashqa karqan.^†

5 Juk junaqmi Rimónpa tsurinkuna Recab y Baana Saúlpa tsurin Is-bosetpa wayinman aywayarqan. Chäyänanpäqa pasaypa achaptinmi cämancho Is-boset punukashqa kaykänä. 6 Wayi punku kichaq warmipis trïguta wayraykanqanchömi punukaskinä. Tsaymi Recab y wawqin Baana wayi rurinman yaykuskir 7 cämancho punuykaptin Is-bosetta wanuskatsiyarqan. Tsaypitanami umanta roquskirnin apakurkur Arabá pampapa aywaq nänipa tsay paqas warat aywayarqan. 8 Hebrónman chaykur rey Davidta entregarmi niyarqan: “Taytay, kay umaqa contrayki Saúlpa tsurin Is-bosetpa umanmi. Wanutsishuynikita munanqanpitami kananqa Saúltapis y tsurinkunatapis Tayta Dios ushakätsishqa”.

9 Tsaynö niyaptinmi David nirqan: “Llapan conträkunapita salvamaq Tayta Dios wiyaykaptinmi qamkunata nï: 10 Kushikunäpä kanqanta yarparmi Saúl wanunqanta juk runa willamaqnï chämurqan. Tsaynö willamaqnï shamuqta tsariskirmi kikinta Siclag markacho wanutsirqä.^† 11 Payta wanutsinqänöllami qamkunatapis wanutsiyäshayki jutsaynaq runa wayincho punuykaqta wanutsiyanqaykipita. Tsaymi kananqa kikikikunatapis ushakätsiyäshayki”.

12 Tsaynö niskirmi soldädunkunata David nirqan paykunata wanutsiyänanpä. Wanuskatsirmi makinkunata y chakinkunata roquskir Hebróncho kaykaq pözu ñöpanman ayankunata warkuyarqan. Is-bosetpa umantanami Abner pamparanqan ñöpanman Hebróncho pampayarqan.