3
Saúlpa soldädunkunawanmi Davidpa soldädunkuna atska wata guërracho kayarqan. Tsaynö pelyar Davidpa soldädunkuna vinciyaptinmi Saúlpa soldädunkuna wallkallana kayarqan.Hebrón markacho Davidpa tsurinkuna yuriyanqan
2 Hebrón markacho kaykaptinmi Davidpa wakin tsurinkuna yuriyarqan:
Mayor tsurinpa jutinmi karqan Amnón. Payqa Jezreelpita warmin Ahinoampa wamranmi karqan.
3 Amnónpa qepanman yuriq tsurinpa jutinmi karqan Quileab. Quileabqa Carmel markacho taq Nabalpa viüdan Abigailpa wamranmi karqan.
Quileabpa qepanman yuriq tsurinpa jutinmi karqan Absalón. Absalónqa Maacapa wamranmi karqan. Maacaqa Gesur markapa mandaqnin rey Talmaipa tsurinmi karqan.
4 Absalónpa qepanman yuriq tsurinpa jutinmi karqan Adonías. Adoníasqa Haguitpa wamranmi karqan.
Adoníaspa qepanman yuriq tsurinpa jutinmi karqan Sefatías. Sefatíasqa Abitalpa wamranmi karqan.
5 Sefatíaspa qepanman yuriq tsurinpa jutinmi karqan Itream. Itreamqa Eglapa wamranmi karqan.
Hebróncho David taykaptinmi tsay tsurinkuna yuriyarqan.
Davidwan Abner amistayanqan
6 Davidpa soldädunkunawan pelyayänanpä Saúlpa soldädunkunata pusharmi Abner mas munayyuq karqan. 7 Saúlpa concubïna warminmi Ajapa tsurin Rizpa karqan. Juk junaq Abnerta qayaykatsirmi Is-boset nirqan: “¡Imanirtä taytäpa concubïnanwan punushqayki!”
8 Tsaynö niptinmi Abnerqa pasaypa ajanashqa nirqan: “¡Noqaqa Judá runakunapa täpakuq allqunku imami kä! Noqaqa imaypis taytayki Saúlta respitarmi llapaykita yanapashqä. Tsaymi munashqätsu Davidpa munaynincho kanaykitapis. ¿Tsaynö yanapaykaptïku kananqa ‘¿imanirtä tsay warmiwan punushqayki?’ nimanki? 9 Kananpitaqa manami yanapashaykinatsu. Tsaypa trokinqa Davidtanami yanapashä. Tayta Dios pasaypa castigamätsun llapan awninqankunata chaskinanpä Davidta mana yanapaptï. 10 Rey kanaykipa trokin Davidnami llapan Israel runakunapa y Judá runakunapa mandaqnin rey kanqa. Paymi Dan markapita Beerseba markayaq mandanqa”.†
11 Tsaynö niptinmi Abnerta mantsar Is-bosetqa imatapis nirqannatsu. 12 Tsaymi willakuqkunata Hebrónman Abner kacharqan Davidta niyänanpä: “Qampa munaynikichönami kay nación kaykan. Tsaynö kaykaptinqa pactuta rurashun wakin Israel runakunatapis munaynikiman churamunäpä”.
13 Tsaynö niptinmi David nirqan: “Allimi kanman qamwan pactuta rurashqa. Itsanqa pactuta ruranantsikpä pushamunki Saúlpa warmi tsurin Micalta. Payta mana pushamurqa ama chämuypistsu”.
14 Nirkurmi Saúlpa tsurin Is-bosetman willakuqkunata David kacharqan niyänanpä: “Warmï Micalta kutitsipaykamay. Paywan tänäpämi juk pachak (100) filisteo runakunata wanuskatsir penqayninkunapa jana qaranta roquskir taytayki Saúlta entregarqä”.†
15 Tsaynö niptinmi runan Paltielwan Mical taykaptin Is-boset rakitsimurqan. Paltielqa Laispa tsurinmi karqan. 16 Micalta rakiskir Abner pushaptinmi runan Paltiel waqaraykar qepankunata aywarqan hasta Bahurim markayaq. Tsaycho wayinpa kutikunanpä Abner niptinmi Paltielqa kutikurqan.
17 Abnernami Israel mayor runakunata nirqan: “Unaypita patsanami munayashqayki David mandamaqnintsik rey kananta. 18 Kananqa rey kananpä churashun. Tayta Diospis nirqanmi: ‘Sirvimaqnï Davidtami yanapashä Israel runakunata filisteo runakunapa munayninpita jipinanpä. Paymi Israel runakunata salvanqa llapan contrankunapa munayninpita’ ”.
19 Tsaynöllami Benjamín trïbu runakunawanpis Abner parlarqan. Tsaypitanami Hebrónman aywar Davidta willar nirqan: “Israel autoridäkuna y Benjamín autoridäkunapis llapanmi munaykäyan rey kanaykita”.
20 Tsaynö niptinmi David kushikurnin Abnerpä y pushanqan ishkay chunka (20) soldädukunapä atska mikuyta kusinatsirqan.
21 Abnernami Davidta nirqan: “Kananqa Israel runakunata qorimunäpä aywashä. Llapan qorikaskirmi rey kanaykipä qamwan pactuta rurayanqa. Tsaynöpami yarpanqaykinö mandanki”.
Tsaypita David despachaptinmi Abner aywakurqan.
Abnerta Joab wanutsinqan
22 Davidwan parlanqanpita Abner yarquskiptillannami Davidpa soldädunkunawan Joab charqan guërracho qechuyämunqankunata atska qepinkuna aparishqa. 23 Soldädunkunawan Joab chaptinmi willayarqan Nerpa tsurin Abner Davidman chanqanta y añaw kutikunanpä David despachanqanta. 24 Tsaynö willayaptinmi rey Davidman aywaykur Joab nirqan: “¡Taytay, imatatä rurashqayki! ¡Imanirtä Abner aywakunanta kachaykushqayki! 25 ¿Manaku tantiyanki Nerpa tsurin Abner engañashunaykipä shamunqanta? Payqa imata ruranqaykitapis rikapakuq y musyapakuqllami shamushqa”.
26 Tsaynö nirmi Joabqa David kaqpita yarquskir runakunata kacharqan Davidta mana musyatsiyllapa Abnerta kutitsiyämunanpä. Tsaymi Sira ninqan pözupita Abnerta kutitsiyämurqan. 27 Hebrón markaman Abner kutiykuptinmi pakayllapa parlananpä marka yaykunaman Joab pusharqan. Tsaychönami wawqin Asaelta wanutsinqanpita kikintapis pachacho wanuqpä tuksiskirqan.
28 Wanutsinqanta musyaskirmi David nirqan: “Tayta Dios musyanmi Nerpa tsurin Abnerta mana wanutsinqäta ni payta wanutsinanpä pitapis mana ninqäta. 29 Abnerta wanutsinqanpita Joabmi jutsayuq kaykan. Tsaynö ruranqanpita llapan castankuna y castankunapita aywaraqkuna imayyaqpis yawarta ishpar o leprawan karpis ñakayätsun. Tsaynöpis weqruyar tukrullawan puriyätsun, espädawan wanutsishqa kayätsun y imaypis muchuyllacho kayätsun”.
30 Tsaynömi wawqin Abisaiwan Joab Abnerta wanutsiyarqan wawqin Asaelta Gabaóncho pelyar wanutsinqanpita.
31 Tsaypitanami Joabta y paywan kaykaq runakunata David nirqan: “Abner wanunqanpita llakikur latsapaykikunata rachiskir lütuyänaykipä qachqa latsapata jatikuyay”.
Tsaynö niskirmi pampaq apayaptin rey Davidpis aywarqan. 32 Tsaychömi David llapan runakunawan Abnerpä qayarayparä waqayarqan. Tsaymi Hebróncho Abnerta pampayarqan. 33 Abnerpä llakikurmi rey David cantar nirqan:
“¡Ay Abner! ¡Imanirtä upa runatanö wanutsishushqayki!
34 Wanutsishunaykipäqa manami makikikunapis watarashqatsu.
Chakikikunapis manami pankarashqatsu.
Qamtaqa mana alli runakunami wanutsiyäshushqayki”.
Abnerpä David tsaynö cantaptinmi runakuna masrä waqayarqan. 35 Tsaypitanami Davidta runakuna rugayarqan patsa manarä tsakaptin imallatapis mikunanpä. Tsaynö rugayaptinpis jurarmi nirqan: “Patsa manarä tsakaptin tantata o imallatapis mikuptïqa Tayta Dios pasaypa castigamätsun”.
36 Abnerta David kuyanqanta tantiyarmi llapan runakuna kushikuyarqan. David ruranqankunaqa llapanpis paykunapä allimi karqan. 37 Tsay junaqmi Israel runakuna tantiyayarqan Nerpa tsurin Abner wanunqanpita rey David jutsaynaq kanqanta.