Judá runakunapa mandaqnin rey kananpä Davidta churayanqan
2
Tsaypitanami Tayta Diosta tapukur David nirqan: “¿Judácho mayqan markamanpis kutïmanku o manaku?”Tsaymi Tayta Dios nirqan: “Kutiy”.
Davidnami tapurqan: “¿Taytay, mayqan markamantä kutïman?”
Niptinmi nirqan: “Hebrón markaman kutiy”.
2 Tsaynö niptinmi ishkan warminta pushakurkur David aywarqan. Jukaq warminpa jutinmi karqan Ahinoam. Payqa Jezreel markapitami karqan. Jukaq warminpa jutinnami karqan Abigail. Payqa Carmelcho taq Nabalpa viüdanmi karqan.† 3 Tsaynöllami yanapaqnin runakunatapis warmintinta y wamrantinta pusharqan. Hebrónman chaykurmi ñöpankunacho kaykaq markakunacho täyarqan. 4 Tsaycho taykäyaptinmi Judá autoridäkuna chaykur Davidpa umanman aceitita wiñar rey kananpä churayarqan.
Tsaypitanami David musyarqan Galaad particho kaykaq Jabes markacho taq runakuna Saúlta pampayanqanta.† 5 Tsaymi Jabes runakunaman willakuqkunata kachar nirqan: “Kuyapäkuq kar Saúlta pampayanqaykipita bendicionninta Tayta Dios qaraykuyälläshuy. 6 Tsaynöpis yanapaykuyälläshuy llapan rurayanqaykikunapis alli kananpä. Noqapis yanapayäshaykimi Saúlta shumaq pampayanqaykipita. 7 Kananqa imapitapis ama llakikuyaynatsu. Rey Saúl wanushqa kaptinmi noqatana rey kanäpä Judá runakuna churayämashqa”.
Israel runakunapa mandaqnin rey kananpä Is-bosetta Abner churanqan
8 Nerpa tsurin Abnernami Mahanaim markaman Saúlpa tsurin Is-bosetta pusharqan. Abnerqa Saúlpa soldädunkunapa mandaqninmi karqan. 9 Tsaychömi runakunata nirqan Is-boset Israel runakunapa mandaqnin rey kanqanta. Tsaymi Is-bosetqa mandarqan Galaadcho, Gesuricho, Jezreelcho, Efraíncho, Benjamíncho y llapan Israelcho taq runakunatapis.a 10 Chusku chunka (40) watayuq Is-boset kaykarmi Israel runakunapa mandaqnin rey kayta qallaykurqan. Paymi ishkay wata rey karqan. Judá runakunallami mandaqnin rey kananpä Davidta churayanqanta välitsiyarqan. 11 Hebrón markapita patsami Davidqa Judá runakunapa mandaqnin rey karqan qanchis wata y soqta killa.
Judá runakunawan Israel runakuna pelyayanqan
12 Tsaypitanami Nerpa tsurin Abner Mahanaimpita Gabaón markaman Saúlpa tsurin Is-bosetpa soldädunkunata pushakurkur aywarqan. 13 Tsaynöllami Sarviapa wawan Joabpis Davidpa soldädunkunata pushakurkur Hebrónpita Gabaón markaman aywarqan. Gabaóncho kaykaq pukyu ñöpanchömi frenti frenti soldädukuna churanakuyarqan. 14 Tsaychömi Joabta Abner nirqan: “Llapantsik rikanantsikpä juk ishkay chölukuna pelyaq yarqayämutsun”.
Tsaynö niptinmi Joabpis nirqan: “Juklla yarqayämutsun”.
15 Tsaymi Saúlpa tsurin Is-bosetpa soldädunkunapita chunka ishkay chölukuna yarquyarqan. Paykunaqa Benjamín trïbu runakunami kayarqan. Tsaynöllami Davidpa soldädunkunapitapis chunka ishkay chölukuna yarquyarqan. 16 Tsaymi umapita tsarinakur custillanpa tuksinakurnin llapan chölukuna wanuyarqan. Tsaynö wanuyanqanpitami tsay partita jutitsiyarqan Helcat-hazurimb jutin kananpä. 17 Wanutsinakuyanqanta rikaykurmi wakin kaq soldädukunapis mantsakaypä pelyar qallaykuyarqan. Tsay pelyachömi Abnerta y pushanqan Israel soldädukunata Davidpa soldädunkuna vinciyarqan.
Asaelta Abner wanutsinqan
18 Tsaychömi Sarviapa kimsa wamrankuna kaykäyarqan. Paykunapa jutinkunami karqan Joab, Abisai y Asael. Asaelqa lluytsunörämi cörriq. 19 Tsaymi Abnerta Asael qatikachar maypa qeshpinantapis dëjarqantsu. 20 Tsaynö qatikachaykaptinmi Abnerqa tumaykur nirqan: “¿Qamqa manaku Asael kanki?”
Tsaynö niptinmi Asael nirqan: “¡Aw, Asaelmi kä!”
21 Tsaymi Abner nirqan: “Amana qatikachämaytsu. Qatikachämänaykipa trokinqa pitapis vincir armankunata apakuy”.
Tsaynö niptinpis Asaelqa mana kachaypami qatikacharqan.
22 Mana cäsuptinmi Abner yapay nirqan: “¡Sänu qarallaykiwan aywakuy! Wanutsiyta mana munaykarpis wanuskatsïmantä. Qamta wanutsirqa ¿ima cäräwanrä wawqiki Joabwan tinkümanpis?”
23 Tsaynö qatikachaptinmi Abnerqa lanzanpa qepa kaq puntanwan pachacho waqtanpa päsaqpä tuksiskiptin Asael wanuskirqan. Wanushqa jitaraptinmi tsaypa päsaqkuna ichiykurrä rikapäyarqan. 24 Wawqinta wanutsinqanta willayaptinmi Joabwan Abisai Abnerta qatikachäyarqan. Rupay jeqaykaptinnami Amma jirkanman chäyarqan. Tsayqa kaykan Gía marka tsimpancho y Gabaóncho kaykaq tsunyaq jirkaman aywana nänipa ñöpanchömi. 25 Tsay jirkanchömi Benjamín trïbu soldädukuna Abnerwan qorikar churanakuyarqan Davidpa soldädunkunawan pelyayänanpä. 26 Nirkurmi Abner qayakur Joabta nirqan: “¡Amana wanutsinakushunnatsu! Tsaynölla wanutsinakurqa kuyapaypämi ushakäshun. ¿Imanirtä soldäduykikunata michankitsu Israel mayinkunata manana wanutsiyänanpä?”
27 Tsaynö niptinmi Joab nirqan: “Tsaynö mana nimaptikiqa patsa waranqanyaqmi qatikachäyäman karqan. Rasun kaqta ninqätaqa Tayta Dios musyanmi”.
28 Tsaymi cornëtata Joab tukaskatsiptin Davidpa soldädunkuna manana qatikachäyarqannatsu. 29 Tsay paqasmi Abner y soldädunkuna kutirnin Jordán mayuta tsimpaskir ñöpancho kaykaq pampaman aywayarqan. Tsaypita Bitrón partipa päsarmi Mahanaim markaman chäyarqan.
30 Abnerta Joab manana qatikachar Davidpa soldädunkunata qorikaskatsir yupaptinmi Asael y chunka isqun soldädukuna pishïyarqan. 31 Abner pushanqan Benjamín trïbu soldädunkunatami Davidpa soldädunkuna kimsa pachak soqta chunkata (360) wanutsiyarqan.
32 Asaelpa ayantanami Belénman apaykur taytan pamparanqan kaqman pampayarqan. Tsaypitanami Joabpa soldädunkuna tsay paqas warat aywar Hebrónman chäyarqan.