Salmo 96 (95)
Mushuq cantuwan alabanqan
1 Mushuq cantuta cantar Tayta Diosta alabayay.
Kay patsacho kaqkuna, Tayta Diosta llapayki alabayay.
2 Tayta Diospa jutinta joqarir cantayay.
Salvakuq kanqanpita qoyay qoyay willakuyay.
3 Munayyuq kanqanta maytsay nacionkunamanpis willakuyay.
Mantsakaypä kaqkunata ruranqankunatapis maytsay markakunacho willakuyay.
4 Tsaynö willakuyay Tayta Dios allillata ruraq kanqanpita.
Llapan runakunapis payta alabayänanpä willakuyay.
Payqa ima diospitapis mas mantsariypämi kaykan.
5 Wakin markakunapa diosninkunaqa ïdulukunallami kaykan.
Tayta Diosqa munayyuq karmi ciëlutapis kamashqa.
6 Almiraypä kaqkunata ruraptinmi ñöpancho pïmaypis alabayan.
Munayyuq karmi templuntapis shumaqyarätsin.
7 Maytsay markacho taqkuna, Tayta Diosta alabayay.
Munayyuq kanqanpita payta adorayay.
8 Tayta Diospa jutinta joqarir adorayay.
Ofrendata apakurkur templunman aywayay.
9 Munayyuq santu Tayta Diosta adorayay.
Entëru patsacho taq runakuna ñöpancho tsuktsukyäyätsun.
10 Maytsay nacionkunacho taq runakunata willayay:
“Tayta Diosqa japallanmi rey.
Paymi kay patsata kamashqa mana kuyukuqta.
Paymi llapan runakunatapis mana jananpaypa juzganqa”.
11 Ciëlupis kay patsapis kushikuyätsun.
Lamarpis y tsaycho kaqkunapis bunyaypa bunyar kushikuyätsun.
12 Chakrakunapis y tsaycho kaqkunapis kushikuyätsun.
Munticho kaq jachakunapis kushikuyätsun.
13 Tayta Diospa ñöpancho kushishqa cantayätsun.
Paymi shamuykan kay patsacho juzgananpä.
Paymi llapan nación runakunata mana jananpaypa juzganqa.