Salmo 97 (96)
Tayta Dios mandamaqnintsik rey kanqan
1 ¡Tayta Diosmi mandamaqnintsik rey!
¡Kay patsacho taqkuna, kushikuyay!
¡Maytsay islacho taqkunapis, kushikuyay!
2 Paypa ñöpankunachöqa yana pukutaymi kaykan.
Alli mandaq karmi pitapis mana jananpaypa juzgan.
3 Ñöpantami lunyaypa lunyar nina aywan.
Tsay ninawanmi chikiqninkunata ushakätsin.
4 Illaqukuyninpis kay entëru patsamanmi atsikyämun.
Tsayta rikarmi kay patsa pasaypa tsuktsukyan.
5 Tayta Diosqa kay entëru patsapa duëñunmi.
Paypa ñöpanchöqa jirkakunapis cëranömi tsulluyan.†
6 Ciëlupis Tayta Dios allillata ruraq kanqantami willakun.
Maytsay nacioncho taq runakunapis munayyuq kanqantami rikayan.
7 Llapan dioskunapis† Tayta Diospa ñöpanmanmi qonqurikuyan.
Tsaymi ïdulukunata adoraqkuna penqakushqa kayanqa.
Ïdulukunata adorar chölu tukuqkunaqa llapanmi penqakuyanqa.
8 Tayta Dios, qammi runakunata shumaq juzganki.
Tsaymi Sióncho taqkuna pasaypa kushikuyan.
Entëru Judácho taq runakunapis pasaypami kushikuyan.
9 Tayta Dios, kay entëru patsacho kaqkunapäpis munayyuqmi kaykanki.
Llapan dioskunapitapis mas munayyuqmi kaykanki.
10 Jutsa rurayta mantsapakuqkunataqa Tayta Dios kuyanmi.
Payman yärakuqkunataqa imapitapis tsapanmi.
Mana alli runakunapa makinpitapis salvanmi.
11 Tsaymi alli runakunaqa aktsichönö alli kawayan.
Dios munanqannö kawaq runakunaqa kushikuyanmi.
12 Alli runakuna, Tayta Diospa makincho kayanqaykipita kushikuyay.
Paypa jutinta joqarir alabayay.