Salmo 98 (97)
Chikiqninkunata vincinqanpita Tayta Diosta alabanqan
(1a) Salmu.
1 (1b) Mushuq cantuwan Tayta Diosta alabayay.
Paymi mantsakaypä kaqkunata rurashqa.
Munayyuq karmi llapan contrankunata vincishqa.
2 Contrankunata vincinqantami Tayta Dios willakushqa.
Chikiqninkunata castiganqantami llapan nacioncho taq runakunata musyatsishqa.
3 Israel runakunata kuyarmi awninqanta cumplin.
Kay entëru patsachömi pïmaypis musyayan Tayta Diosnintsik salvakuq kanqanta.†
4 Kay patsacho taqkuna, kushikur Tayta Diosta alabayay.
Llapan shonquykikunawan cantukunata cantayay.†
5 Arpata tukayllapa Tayta Diosta alabayay.
Cuerdayuq instrumentukunata tukayllapa alabayay.
6 Tayta Diosqa mandamaqnintsik reymi.
Cornëtakunata y waqrakunata tukayllapa alabayay.
7 Lamarpis y tsaycho kaqkunapis kushishqa qayaykachäyätsun.
Kay patsapis y kay patsacho taqkunapis pasaypa kushikuyätsun.
8 Mayukunapis kushikuypita taqllapäyätsun.
Jirkakunapis kushishqa cantayätsun.†
9 Tayta Diospa ñöpancho alabayätsun.
Payqa llapan runakunata juzgananpämi shamuykan.
Paymi kay patsacho taqkunata pitapis mana jananpaypa juzganqa.