Salmo 99 (98)
Tayta Dios munayyuq rey kanqanpita alabanqan
1 ¡Tayta Diosmi mandamaqnintsik rey!
Querubinkunapa chawpinchömi trönunpis kaykan.†
Juzgaptinmi kay patsapis y llapan runakunapis tsuktsukyäyanqa.
2 Sión jirkancho Tayta Dios munayyuqmi kaykan.
Kay patsacho kaykaq runakunata llapantami munaynincho tsararaykan.
3 ¡Munayyuq y mantsariypä kanqanpita alabayay!
¡Payqa santumi!
4 Tayta Dios, munayyuq reymi kanki.
Imaypis allillatami ruranki.
Entëru Israel nacionchömi imaypis alli mandanki.
5 ¡Tayta Diosnintsikta alabayay!
¡Ñöpanman qonqurikuyay!
¡Payqa santumi!
6 Moiséswan Aarónmi sirviqnin sacerdötikuna kayarqan.
Samuelnami imaypis payta mañakurqan.
Paykuna mañakuyaptinmi Tayta Dios imaypis yanaparqan.
7 Pukutay ichiraykaqpitami Moiséstawan Aarónta parlapämurqan.†
Paykunami llapan leyninkunata cumpliyarqan.
8 Tayta Diosllä, mañakuyäshuptiki wiyarqaykimi.
Jutsata rurayanqanpita castigarpis perdonarqaykimi.
9 ¡Tayta Diosnintsikta alabayay!
¡Sagrädu jirkanman aywaykur qonqurikuyay!
¡Tayta Diosnintsikqa santumi!