Salmo 95 (94)
Tayta Diosta kushishqa alabanqan
1 Llapayki shayämuy Tayta Diosta kushishqa alabanantsikpä.
Tsapämaqnintsikta y salvamaqnintsikta adorashun.
2 Tayta Diospa ñöpanman aywaykura agradëcikushun.
Cantukunata cantarnin alabashun.
3 Tayta Diosqa llapanpä munayyuq reymi.
Paymi llapan dioskunapitapis mas munayyuq rey kaykan.
4 Paypa makinchömi patsa rurinpis kaykan.
Paypami altunnin jirkakunapis kaykan.
5 Kamashqa kaptinmi lamarpis paypa kaykan.
Kikinmi makinwan kay patsatapis kamashqa.†
6 Llapayki shayämuy qonqurikuykur Tayta Diosta adoranantsikpä.
Paypa ñöpanman qonqurikushun.
Paymi kamamaqnintsik.
7 Paymi Diosnintsik kaykan.
Noqantsikmi akranqan runakuna kaykantsik.
Majädancho kaykaq üshanmi kaykantsik.
Tayta Dios ninqanta kanan junaq wiyaykarqa
8 Meriba particho unay castaykikuna chukru shonqu kayanqannö ama kayaytsu.
10 Tsay janan paykunawan chusku chunka (40) watantin ajashqa karmi nirqä:
“Kay runakunaqa oqrakashqanömi kaykäyan.
Yätsinqätapis manami cäsukuyantsu”.
11 Tsaymi ajanarnin jurar nirqä:
“Paykunaqa awninqä jamayman manami yaykuyanqatsu”.†