Salmo 94 (93)
Mana alli runakunata Tayta Dios juzgananpä kanqan
1 Tayta Dios, contraykikunata castigaq kaykarqa yanapaykallämay.
2 Kay patsacho llapan runakunata juzgaq juezmi kaykanki.
Runa tukuqkunata juzgar castigaykullay.
3 Tayta Dios, ¡imayyaqrä mana alli runakuna kushipayämanqa!
4 ¡Imayyaqrä jutsata rurayanqanpita allish tukur puriyanqa!
¡Imayyaqrä runa tukuyanqa!
5 Tayta Dios, paykunaqa kuyanqayki runakunatami manakaqman churayan.
Herenciaykipä akranqayki runakunatami ñakatsiyan.
6 Viüdakunata, jäpakunata y waktsakunatami wanutsiyan.
7 Paykunami burlakur niyan:
“Tayta Dios manami rikantsu.
Jacob yärakunqan Dios manami cuentatapis qokuntsu”.
8 Mana tantiyakuq upa runakuna, ¿imanirtä tantiyakuyankitsu?
¡Imayrä tantiyakuyanki Tayta Dios munayyuq kanqanta!
9 Rinritapis ruraykarqa ¿manatsurä wiyamäshun?
Ñawitapis ruraykarqa ¿manatsurä rikamäshun?
10 Wakin nacionkunacho taqkunatapis castigaykarqa ¿manatsurä qamkunatapis castigayäshunki?
Runakunata yachatsinanpä llapantapis musyaykarqa ¿manatsurä rurayanqaykitapis musyan?
11 Tayta Diosqa musyanmi runakuna manakaqkunallaman umankuna churakashqa kayanqanta.†
12 Tayta Dios, corriginqayki runa kushishqami kawanqa.
Kushishqami kawanqa leynikikunata yachatsinqayki runa.
13 Tsay runaqa desgracia päsaptinpis añawmi kawanqa.
Mana alli runakunami itsanqa kikinkunalla wanuytapis ashiyan.
14 Kuyanqan runakunataqa imaypis Tayta Dios manami kacharinqatsu.
Payman yärakuq runakunataqa imaypis yanapanqami.
15 Juezkunapis shumaqnami runakunata arreglayanqa.
Tsaynö juzgaptinqa alli runakunapis kushikuyanqami.
16 Mana alli runakuna conträ shäriyaptin ¿pillarä janä shärinqa?
Llutan ruraq runakuna conträ shäriyaptin ¿pillarä yanapamanqa?
17 Tayta Dios mana yanapamaptinqa maynami wanur ushakäman karqan.
18 Tayta Dios, ima ruraytapis mana kamäpakurmi yanapamänaykipä mañakushqä.
Kuyapäkuq karmi yanapamashqayki.
19 Pasaypa llakishqa kaykaptïmi imaypis shakyätsimashqayki.
20 ¿Mana alli juezkunapa amïgun kankimantsurä?
Paykunaqa leykunata mana cäsukurmi runakunata ñakatsiyan.
21 Paykunaqa jutsaynaq runakunapa contran shäriyänanpämi willanakuyan.
Alli runakunata wanutsiyänanpämi awniyan.
22 Tsaynö kaptinpis Tayta Diosmi noqataqa tsapäman.
Amparakunä qaqami payqa kaykan.
23 Mana alli runakunataqa paymi castiganqa.
Tayta Diosnintsikmi paykunata ushakätsinqa.