Salmo 93 (92)
Tayta Dios mandaq rey kanqan
1 ¡Tayta Diosmi mandamaqnintsik rey!
¡Tayta Diosmi chipipiykaq latsapan jatishqa kaykan!
¡Paymi imayyaqpis munayyuq kaykan!
Paymi kay patsa mana kuyukunanpä shumaq takyätsishqa.
2 Tayta Dios, unaypita patsami mandaq kaykanki.
Qamqa imapis manarä kaptinmi mayna karqaykina.
3 Tayta Dios, mayumi pasaypa jakaykan.
Bunyaypa bunyarrämi aywaykan.
Bötiypa bötirrämi aywaykan.
4 Qammi itsanqa jakashqa mayupitapis mas munayyuq kaykanki.
Lamarcho jatunkaray öla shäriqpitapis mas munayyuqmi kaykanki.
5 Ninqaykikunataqa imaypis cumplinkimi.
Templuykiqa imayyaqpis sagrädumi kaykan.