Salmo 92 (91)
Kuyakuq kanqanpita Tayta Diosta alabanqan
(1) Kay salmuqa jamay junaqcho cantanapä cantumi kaykan.
1 (2) Tayta Dios, qamta agradëcikunqäqa pasaypa allimi.
Poderyuq Tayta Dios, qamta alabar pasaypami kushikü.
2 (3) Tutapami kuyapäkuq kanqaykipita alabashayki.
Paqaspanami awninqaykita cumpliq kanqaykipita adorashayki.
3 (4) Chunka cuerdayuq taksha arpawan, jatun arpawan y salteriuwanmi alabashayki.
4 (5) Tayta Dios, llapan ruranqaykita rikarmi kushikü.
Tsaymi shonqüpis pasaypa kushikun.
5 (6) Tayta Dios, ruranqaykikunaqa mantsakaypämi kaykan.
Yarpanqaykitaqa ¿pirächi musyanman?
6 (7) Llutan ruraq runakunaqa tsaykunata manami tantiyayantsu.
7 (8) Waray warantin ushakäyänallanpämi mana alli runakuna y mana cäsukushuqniki runakuna mana alli qewanö miraykäyan.
8 (9) Tayta Dios, qammi itsanqa imayyaqpis rey kaykanki.
9 (10) Contraykikunaqa llapanmi ushakäyanqa.
Mana alli runakunaqa maytsaypami llapanpis aywakuyanqa.
10 (11) Törupa kallpannö kallpäpis kananpämi kallpatapis qaramanki.
Yanapamaptikimi pasaypa kushikü.
11 (12) Rikashärämi conträkuna ushakäyanqanta.
Chikimaqnïkuna ñakar waqayanqantapis wiyashärämi.
12 (13) Alli runakunaqa palmëra jachanörämi atska wata kawayanqa.
Líbanucho cedru jachanörämi kayanqa.
13 (14) Tayta Diospa wayinchömi imaypis paykuna kaykäyan.
Templu patiucho kuyayllapä waytakunanömi kaykäyan.
14 (15) Awkinyarpis chölunöllami kaykäyan.
Imaypis mana qeshyaypa alli kallpayuqmi kaykäyan.
15 (16) Tsaychömi Tayta Dios tsapämaqnintsik kanqanta willakuyan.
Alli runakunapa janan imaypis shärinqantami willakuyan.