Salmo 91 (90)
Imayka mana allipitapis Tayta Dios tsapanqan
1 Tayta Diospa makincho kawaq runataqa munayyuq Tayta Diosmi imapitapis tsapanqa.
2 Tayta Diosta mañakurmi nï:
“Qammi tsapämaqnï kaykanki.
Qammi amparakunä törri kaykanki.
Qamllami yärakunqä Diosnï kaykanki”.
3 Tayta Diosmi salvashunki contraykipa makinpita.
Paymi tsapäshunki wanutsikuq qeshyapitapis.
4 Paymi älankunawan tsapäshunki.†
Älan rurincho karmi imatapis mantsarinkinatsu.
Awninqanta cumplirmi escüdunö imaypis tsapäshunki.
5 Paqaspa ima kaptinpis manami mantsarinkitsu.
Junaqpa flëchayaptinpis manami mantsarinkitsu.
6 Paqaspa o junaqpa pesti qeshya pïmayta wanutsiptinpis manami mantsarinkitsu.
7 Itsuq kaqlänikipa juk waranqata (1,000) wanutsirpis y derëcha kaqlänikipa chunka waranqata (10,000) wanutsirpis qamtaqa manami wanutsishunkitsu.
8 Kikikimi rikanki mana alli runakunata castiganqanta.
9 Tayta Diosman yärakur kawaptiki y poderyuq Diosman amparakuptikiqa 10 ima desgraciapis manami päsashunkitsu.
Wayikicho taqkunapis manami qeshyayanqatsu.
11 Angelninkunatami Tayta Dios kachamunqa maypa aywaptiki imapitapis tsapäyäshunaykipä.
12 Paykunami tsariyäshunki ni chakillaykitapis rumikunacho mana takakunaykipä.†
13 Leonkuna y culebrakuna kanqanchöpis añawmi purinki.
Malta leontapis y culebratapis jarutakunkimi.†
14 Tayta Diosmi nin:
“Kuyamaqkunataqa noqami salvashä.
Jutïta joqariqkunataqa imaypis rikashämi.
15 Mañakayämaptinqa awnishämi.
Llakikuyaptinpis kikïmi paykunawan kaykäshä.
Yanaparmi ñakaykunapita jipishä.
16 Atska wata kawayänanpämi yanapashä.
Salvaptïmi imaypis kushikuyanqa”.