Libru 4
Salmo 90—106
Salmo 90 (89)
Yupashqa watalla runakuna kawayanqan
(1a) Kay salmuqa Tayta Diospa sirviqnin Moisés rugakunqanmi.
1 (1b) Tayta Dios, qammi imayyaqpis pakakuyänä kaykanki.
2 Jirkakuna manarä kaptinpis y kay patsa manarä kaptinpis unaypita patsami imayyaqpis qamlla Dios kaykanki.
3 Qam munaptikimi runakuna wanuyan.
Qam niptikimi wanur allpaman tikrayan.
4 Qampäqa juk waranqa (1,000) watapis juk junaqnöllami kaykan.
Paqaspa juk ishkay höra päsaqnöllami kaykan.†
5 Illaqpitami runakunata yaku apaqnö apakunki.
Runakunaqa juk qemtsiynöllami kaykäyan.
Llullu qewanöllami kaykäyan.†
6 Tukturaykar warämuq waytanö karpis tardipa wanupar tsakiqnömi kaykäyan.
7 Rabyarqa rasmi ushakätsiyämanki.
Ajanaptikiqa pasaypami mantsariyä.
8 Llapan jutsa rurayanqäta musyaykankimi.
Pakayllapa mana allita rurayanqätapis rikaykankimi.
9 Pasaypa ajaptikiqa chipyaqmi ushakäyäshä.
Imayka jamaynöllami kawaynïkunapis kaykan.
10 Wakinnïqa qanchis chunka (70) watayaqllanami kawayä.
Mas jinchi kaqkunallami puwaq chunka (80) watayaq chäyan.
Tsaynö atska wata kawarpis aruywan ñitipakashqallami kawayä.
Watakuna ras päsanqannömi noqakunapis ushakäyä.†
11 Imajinanpa rabyanqaykita manami pipis musyantsu.
Tsayjinanpa ajananqaykita manami pipis tantiyantsu.
12 Yupashqa watalla kawayänäpä kanqanta tantiyaykatsiyällämay.
Tsaynöpami tantiyakuyäshä munanqaykinö kawayänäpä.
13 Tayta Dios, yapay yanapaykayällämay.
¡Imayyaqrä qonqaykayämanki!
Sirviqniki kaykäyaptïqa kuyapaykayällämay.
14 Kuyakuynikiwan cada tuta yanapaykayällämay.
Tsaynöpami wanuyanqäyaq imaypis kushishqa alabayäshayki.
15 Atska wata llakikullar kawayänäpämi ñakayman churayämashqayki.
Tsayman tupu atska wata kushishqa kawayänäpä yanapaykayällämay.
16 Sirviqniki kaykäyaptïqa noqakunatapis tsurïkunatapis yanapayämar kushikuypä kaqkunata ruraykullay.
17 Tayta Diosllä, kuyakuq kanqaykita tantiyaykatsiyällämay.
Llapan aruynïkunamanpis bendicionnikita churaykallämuy.