Salmo 89 (88)
Davidta awninqanpita Tayta Diosta alabanqan
(1) Kay salmuqa Ezra casta Etán qellqanqan salmumi.
1 (2) Tayta Dios, kuyapäkuq kanqaykipitami imaypis alabashayki.
Llapan awninqaykita cumpliq kanqaykitami imaypis willakushä.
2 (3) Noqaqa willakushä imaypis kuyakuq kanqaykitami.
Awninqaykikunaqa ciëlunöpis manami trukakantsu.
3 (4) Qammi nirqayki: “Akranqä runawanmi pactuta rurarqä.
Sirvimaqnï Davidta awnirmi nirqä:
4 (5) ‘Noqami kamakätsishä qampita aywaraqkuna imayyaqpis rey kayänanpä’ ”.† Selah
5 (6) Tayta Dios, mantsakaypä kaqkunata ruranqaykipitami ciëlucho kaqkunapis alabayäshunki.
Cumpliq kanqaykipitami ñöpaykicho kaykaq angelkunapis adorayäshunki.
6 (7) Qamnöqa manami pipis ciëlucho kantsu.
Munayyuq karpis manami qammanqa tinkuntsu.
7 (8) Ciëlucho angelkuna qorikäyanqanchöpis mantsariypämi kanki.
Ñöpaykicho kaykaq angelkunapitapis mas munayyuqmi kanki.
8 (9) Llapanta mandaq Tayta Dios, ¿pirä qammanqa tinkunman?
Qamllami llapanpä munayyuq kanki.
Awninqaykitaqa imaypis cumplinkimi.
9 (10) Lamar pasaypa pulchaqyar shäriykaqtapis qammi mandanki.
Pulchaqyar öla shäriptinpis qammi wiyätsinki.
10 (11) Lamarcho mantsaypä Rahab kurutapis llaptsirqaykimi.†
Munayyuq karmi chikishuqnikikunatapis maytsaypa qarqurqayki.
11 (12) Ciëlupis y kay patsapis qampami kaykan.
Kay patsacho kaqkunatapis qammi kamarqayki.
12 (13) Qammi kamarqayki nortilätapis y surlätapis.
Tabor jirkapis y Hermón rajupis kushishqami alabayäshunki.†
13 (14) Qamqa llapanpä munayyuqmi kaykanki.
Derëcha kaq makillaykiwanmi llapantapis vincinki.
14 (15) Allikunata rurar y pitapis mana jananpaypa juzgarmi alli mandaq kanki.
Kuyakuq kanqaykita y awnir cumplinqaykitami pïmaytapis tantiyatsinki.
15 (16) Kushishqami kawayanqa alabashuqnikikuna.
Tayta Dios, paykunaqa ñöpaykichömi kawayan.
16 (17) Jutikita joqarirmi qoyay qoyay kushishqa kawayan.
Allita ruraq kanqaykipitami kushikuyan.
17 (18) Kushikuyänanpämi shumaq yanapanki.
Yanapayämaptikimi munayyuqpis kayä.
18 (19) Tayta Diosmi tsapämaqnintsik escüdu kaykan.
Israel runakunapa santu Diosninmi mandamaqnintsik rey kaykan.
19 (20) Unayqa sirvishuqniki profëtakunata revelarmi nirqayki:
“Israel runakunapitami alli chöluta akrashqä.
Paytami yanapashqä pïmaypis respitayänanpä.
20 (21) Payqa sirvimaqnï Davidmi kaykan.
Rey kananpämi sagrädu aceitita umanman wiñatsishqä.†
21 (22) Mana kachaypami paytaqa imaypis yanapashä.
Kikïmi kallpata qoshä.
22 (23) Chikiqninkunapis manami vinciyanqatsu.
Mana alli runakunapis munaynincho manami katsiyanqatsu.
23 (24) Chikiqninkunataqa paypa ñöpanchömi llapirishä.
Tsay runakunataqa chipyaqmi ushakätsishä.
24 (25) “Payta kuyarmi llapan awninqäta cumplishä.
Yanapaptïmi munayyuq rikakunqa.
25 (26) Mediterráneo Lamarpita Éufrates mayuyaq mandaq kananpämi yanapashä.
26 (27) Paymi nimanqa:
‘Taytämi kanki.
Diosnïmi kanki.
Salvamaqnï y tsapämaqnï qaqami kanki’.
27 (28) “Davidqa mayor tsurïmi kanqa.
Kay patsacho llapan reykunapitapis mas munayyuqmi kanqa.†
28 (29) Paytaqa imaypis kuyaykäshämi.
Paywan pactu ruranqätaqa imaypis cumplishämi.
29 (30) Ciëlu imaypis kanqannömi paypita aywaraqkuna imaypis rey kayanqa.
30 (31) Yachatsinqäta paykuna qonqäyaptin,
ninqäta mana cäsukuyaptin,
31 (32) leynïkunata mana cumpliyaptin
y mandamientükunata mana wiyakuyaptinqa
32 (33) pasaypami garutishä.
Jutsata rurayanqanpitami asutashä.†
33 (34) Tsaynö castigarpis Davidta kuyarmi awninqäta imaypis cumplishä.
34 (35) Paywan pactu ruranqäta manami imaypis qonqäshätsu.
Llapan awninqätami cumplishä.
35 (36) Kikïmi Davidta awnishqä.
Awninqätaqa llapantami cumplishä.
36 (37) Paypita aywaraqkunami imaypis rey kayanqa.
Rupay imaypis kanqannömi imaypis mandaq kayanqa.
37 (38) Ciëlucho killa imaypis kanqannömi imayyaqpis mandaq kayanqa”. Selah
38 (39) Tayta Dios, tsaynö awniykarpis akranqayki rey ajanätsishuptiki mananami yanapankinatsu.
39 (40) Sirvishuqniki Davidwan pactu ruranqaykitapis manami cumplinkinatsu.
Pïmaypis jarutakuyänanpä corönanta jitariqnömi rey kayninpita jitarishqayki.
40 (41) Taykanqan marka murällatapis maynin tsayläpami juchutsishqayki.
Amparakuna markankunatapis raqällatanami kachaykushqayki.
41 (42) Pïmaypis tsaypa päsaqkunaqa munanqantami apakuyan.
Vecïnun nación runakunapis asipäyanmi.
42 (43) Reypa chikiqninkunata yanapaptikimi vinciykur kushikuyan.
43 (44) Vinciyänanpämi reypa soldädunkunatapis qelanätsishqayki.
Pelyachöpis manami yanapashqaykitsu.
44 (45) Reypa munaynintami qechushqayki.
Mandaq kaynintapis manakaqmanmi churashqayki.
45 (46) Chölullarä kaykaptinmi rey kayninpita jipishqayki.
Pasaypa penqakuymanmi churashqayki.† Selah
46 (47) Tayta Dios, ¡imayyaqrä noqakunapita pakakunki!
¿Jinallatsurä ajashqa kaykanki?
47 (48) Tayta Dios, wallka watalla kawanäpä kanqanta yarpaykullay.
Kamanqayki runakunaqa juk ishkay watallami kawayan.
48 (49) ¿Pirä mana wanuypa kawanman?
¿Pirä wanuypita qeshpinman? Selah
49 (50) Tayta Dios, Davidta imaypis kuyapänaykipä awninqaykita ¿imanirtä qonqaykushqayki?
50 (51) Tayta Dios, qamta sirviyaptï pïmaypis qayapäyämanqanta wiyaykullay.
Maytsay nacioncho runakuna ashlliyämanqantaqa shonqullächömi yarparaykä.
51 (52) Tayta Dios, chikishuqnikikunami wajupaykäyäman.
Akranqayki runakuna kayaptïmi qoyay qoyay qayapaykäyäman.
52 (53) Tayta Dios imayyaqpis alabashqa kaykullätsun.
¡Amén! ¡Tsaynö katsun!