Salmo 88 (87)
Wanuypita salvananpä mañakunqan
(1) Kay salmutaqa cantanantsikpämi Corépita aywaraqkuna qellqayarqan. Cantaqkunapa mandaqninpämi. Mahalat.a Ezra casta runa Hemán qellqanqan salmumi kaykan.
1 (2) Salvamaq Tayta Diosllä, paqaspapis junaqpapis yanapamänaykipämi mañakamü.
2 (3) ¡Mañakamunqäta wiyaykallämay!
¡Rugakamunqäta awniykallämay!
3 (4) Pasaypami ñakaykä.
Wanuypis janächönami.
4 (5) Wanunäpäna kanqantami pïmaypis yarpäyan.
Pasaypami aywapakaykä.
5 (6) Ayakuna jitaraykanqancho jitaraqnömi kaykä.
Guërracho wanutsishqa runa pamparaykaqnömi kaykä.
Kacharinqayki runanönami kaykä.
Chipyaq qonqaykunqayki runanönami kaykä.
6 (7) Mantsariypä patsapa shiminman qaykamaqnömi pasaypa tsakayman jitarpamashqayki.
7 (8) Pasaypa ajar castigamaptikimi imayka lamarpa ölancho illakaqnö kaykä. Selah
8 (9) Llapan amïgükunata ñöpäpita qarquptikimi japalläna kaykä.
Paykunaqa rikamaytapis manami munayannatsu.
Carcelcho wichqaraykaqnömi maypa qeshpiytapis kamäpakütsu.
9 (10) Waqaykällarmi qaprayarküna.
Tayta Dios, qoyay qoyaymi rugakamü.
Makïta joqarkurmi qamta rugakamü.
10 (11) Milagrukunata ruraptikipis ¿wanushqakuna rikayanqatsurä?
Pamparaykäyanqanpita agradëcikuyäshunaykipä ¿shäriyämunqatsurä? Selah
11 (12) Kuyakuq kanqaykipita ¿sepultüracho parlayanqatsurä?
Alli kanqaykita ¿ayakuna willanakuyanqatsurä?
12 (13) Wanuskirqa llapantami qonqaskiyanqa.
Allikunata ruranqaykita y mantsariypä ruranqaykitapis ¿pillaqa yarpanqatsurä?†
13 (14) Tayta Dios, noqami itsanqa yanapamänaykipä qamllata mañakamü.
Tsaka tsakallami qamta rugakamü.
14 (15) Tayta Dios, ¿imanirtä qonqaykamanki?
¿Imanirtä noqapita pakakunki?
15 (16) Chölullarä kanqäpita patsami pasaypa ñakar ichikpatsu wanushqä.
Mana atipaypä castïgukunawanmi ñakatsimashqayki.
Mastaqa mananami atipayta puëdïnatsu.
16 (17) Pasaypa ajar castigamaptikimi mantsakashqa kaykä.†
17 (18) Ñakayllami imay hörapis tumapaykäman.
Ñakaykunawanmi imayka yakucho shenqaykaqnö kaykä.
18 (19) Amïgükunatapis y castäkunatapis ñöpäpita qarqushqaykimi.
Kananqa pasaypa tsakaykaqchönömi llakishqa kaykä.