Salmo 87 (86)
Jerusalén markata Tayta Dios kuyanqan
(1a) Kay salmutaqa cantanantsikpämi Corépita aywaraqkuna qellqayarqan.
1 (1b) Sagrädu jirkanchömi markanta Tayta Dios shäritsishqa.
2 Sióntami Tayta Dios kuyan.
Israel nacioncho kaykaq wakin markakunapitapis masmi kuyan.
3 Tayta Diospa markan, qampäqa alli marka kanqaykitami pïmaypis parlayan. Selah
4 Wakin markakunapäpis Tayta Diosmi nin:
“Egipto runakunapis y Babilonia runakunapis cäsukayämanqami.
Filisteo runakunapis, Tiro runakunapis y Etiopía runakunapis chaskikayämanqami.
Paykunapis Sióncho yuriqnöllami kayanqa”.
5 Tsaymi niyanqa: “Taqay runa Sióncho yuriqnömi kaykan”.
Poderyuq Tayta Diosmi Sión runakunata yanapan.
6 Jutinkunata libruman apuntarmi qellqanqa:
“Kay runaqa Sióncho yuriqnömi kaykan” nir. Selah
7 Paykunaqa cantarnin danzarninmi niyanqa:
“Noqapa markäqa Siónmi”.