Salmo 86 (85)
Tayta Dios kuyapaykunanpä mañakunqan
(1a) Kay salmuqa Tayta Diosta David mañakunqanmi.
1 (1b) Tayta Dios, rugakamunqäta wiyaykallämay.
Pasaypa llakikurmi ima ruraytapis kamäpakütsu.
2 Qam munanqaykinö kawarmi wanuypita salvaykamänaykipä mañakamü.
Sirviqniki karmi rugakamü imaykapitapis tsapaykamänaykipä.
Diosnï kaptikimi qamman yärakamü.
3 Tayta Dios, kuyapaykallämay.
Imay hörapis qamtami mañakamü.
4 Sirviqniki karmi shakyätsimänaykipä mañakamü.
Qamllamanmi imay hörapis yärakamü.
5 Qamqa allillata ruraqmi y perdonakuqmi kanki.
Qamman yärakamuqkunataqa kuyapankimi.
6 Tayta Dios, mañakamunqäta wiyaykallämay.
Rugakamunqäta chaskiykallämay.
7 Imaypis wiyamanqaykita musyarmi llakikunqä höra mañakamü.
8 Tayta Dios, manami qamnöqa ima diospis kantsu.
Qam ruranqaykitanöqa manami pipis rurantsu.
9 Qammi llapan nacionkunata kamarqayki.
Llapan nación runakunami adorayäshunaykipä shayämunqa.
Ñöpaykiman qonqurikaykamurmi jutikita joqariyanqa.†
10 Qamllami Dios kaykanki.
Munayyuq karmi mantsariypä milagrukunatapis ruranki.
11 Tayta Dios, imanö kawanäpäpis nänikita reqiykatsimay.a
Tsay nänipami imaypis purishä.
Llapan shonqüwan qampita mantsapakunäpä yanapaykamay.
12 Tayta Dios, llapan shonqüwanmi alabashayki.
Jutikita joqarirmi imaypis adorashayki.
13 Noqataqa pasaypami kuyamanki.
Wanuypitapis salvamashqaykimi.
14 Tayta Dios, mana alli runakunami conträ shärir wanutsimayta munaykäyan.
Tsay runakunaqa manami imapäpis cuentayäshunkitsu.
15 Tayta Dios, qamqa alli shonqu y kuyapäkuqmi kanki.
Jukllaqa manami ajanankitsu.
Kuyapäkuq y rasun kaqllata parlaqmi kaykanki.
16 Mañakamunqäta wiyamar kuyapaykallämay.
Sirviqniki kaykaptïqa kallpata qoykallämay.
Sirvishuqniki warmipa wawan kaykaptïqa salvaykallämay.
17 Conträkuna penqakuyänanpä paykuna rikanancho yanapaykallämay.
Tayta Dios, qamllami yanapamanki y kushikatsimanki.