Salmo 85 (84)
Israel runakunata yanapananpä mañakunqan
(1) Cantaqkunapa mandaqninpämi. Corépita aywaraqkuna qellqayanqan salmu.
1 (2) Tayta Dios, qammi nacionnikita kuyapashqayki.
Jacobpita aywaraq runakunata yapaymi yanapashqayki.
2 (3) Kuyanqayki runakuna jutsata rurayanqanta llapantami perdonashqayki. Selah
3 (4) Pasaypa ajaynikipis qallqushqanami.
4 (5) Salvamaqnï Tayta Dios, kananpis yapay salvaykayällämay, ari.
Ajashqalla amana kakuytsu.
5 (6) ¿Tsaynöllatsurä imayyaqpis noqakunawan ajashqa kaykanki?
6 (7) ¿Manatsurä alli kawayänäpä yanapaykayämanki?
Tsaynöpami yapay kushikuyäshä.
7 (8) Tayta Dios, kuyayämanqaykita tantiyaykatsiyällämay.
¡Yapay salvaykayällämay!
8 (9) Noqaqa Tayta Dios ninqantami wiyakushä.
Paymi kuyanqan kaqkunata yanapanqa jutsata mana rurar pïmaywanpis alli kawayänanpä.
9 (10) Payta mantsapakushqami noqantsikwan kaykan salvamänantsikpä.
Kikinmi nacionnintsikcho imayyaqpis tanqa.
10 (11) Tayta Diospa kuyakuynin y yanapakuynin juntumi shamunqa.
Alli kawaynin y salvacionninmi makallanakushqa chäyämunqa.
11 (12) Yanapakuyninqa muru jeqamuqnömi patsapita jeqamunqa.
Salvacionninqa ciëlupita patsami rikakämunqa.
12 (13) Tayta Diosmi yanapamäshun alli kawanantsikpä.
Chakrantsikkunachöpis mikuykuna allimi wayunqa.
13 (14) Salvacionninqa juk willakuqnömi ñöpanta aywanqa.
Willakuyninqa alli nänipami pushamäshun.