Salmo 84 (83)
Tayta Diospa templuncho kayta munanqan
(1) Cantaqkunapa mandaqninpämi. Üvata jarur cantayanqayki tönuwan kay salmuta cantayanki. Corépita aywaraqkuna qellqayanqan salmu.
1 (2) Llapanta mandaq Tayta Dios, pasaypa kuyayllapämi täkunayki templu.
2 (3) Imaykanöpami templu patiucho kayta munä.
Llapan shonqüwanmi imayyaqpis kawaq Diosta kushishqa alabä.
3 (4) Altarnikikuna ñöpankunachömi pichuychankapis y wayanïtupis qeshunkunata rurayan.
Tsaychömi pushapankunatapis shakshätsiyan.
Qammi kanki llapanta mandaq Tayta Dios, mandamaqnï rey y Diosnillä.
4 (5) Wayikicho taqkunaqa kushishqami kayan.
Paykunaqa imaypis alabayäshunkimi. Selah
5 (6) Kushishqami kaykan yanapanqayki runa.
Paymi templuykiman llapan shonqunwan aywayta munan.
6 (7) Waqay Raqrapa päsaptinpis tamya tiempuchönömi tsaki pukyukuna pashtamunqa.a
7 (8) Ima päsaptinpis kallpan manami ushakanqatsu.
Siónman chaykurnami llapanpä munayyuq Tayta Diospa ñöpanman yaykunqa.
8 (9) Llapanta mandaq Tayta Dios, mañakamunqäta wiyaykallämay.
Jacob yärakunqan Tayta Dios, rugakamunqäta chaskiykallämay. Selah
9 (10) Tayta Dios, akranqayki reyta yanapaykullay.
Payqa tsapakunä escüdunömi kaykan.
10 (11) Juk waranqa (1,000) junaq juklächo qoyänäpa trokinqa mas allimi kanman juk junaqllapis wayikicho qoyaptï.
Jutsasapakunapa wayincho qoyänäpa trokinqa mas allimi kanman wayiki yaykunallachöpis kaptï.
11 (12) Tayta Diosmi kawayta qaramantsik y escüdunö tsapämantsik.
Paymi kuyamantsik y alliman churamantsik.
Pay munanqannö kawaqkunataqa alli kaqkunatami kamaripan.
12 (13) Llapanta mandaq Tayta Dios, qamman yärakamuq runaqa kushishqami kawan.