Salmo 83 (82)
Chikiqninkunata ushakätsinanpä mañakunqan
(1) Cantanantsikpämi. Asaf qellqanqan salmu.
1 (2) Tayta Dios, janäkuna shäriykullay.
Ama ari upälla rikaräyämaytsu.
2 (3) Chikishuqniki runakunami wajupaykäyäman.
Contraykimi qampapis shäriykäyan.
3 (4) Kuyanqayki runakuna kaykäyaptïpis atacayämänanpämi willanakuykäyan.
Rikanqayki runakuna kaykäyaptïpis conträkunami shäriykäyan.
4 (5) Tsay runakunami nikäyan:
“Paykunata nacionninpa chipyaq illakätsishun.
Israel runakunapä pipis mana yarparaykänanpä chipyaq ushakätsishun”.
5 (6) Tsay yarpayllami llapanpis willanakuyashqa contrayki shäriyänanpä.
6 (7) Paykunami kaykäyan edomita runakuna, ismaelita runakuna, moabita runakuna y agareno runakuna.
7 (8) Tsaynöllami kaykäyan Gebal runakuna, amonita runakuna, amalecita runakuna, filisteo runakuna y Tiro runakuna.
8 (9) Lotpita aywaraqkunatamia Asiria runakuna yanapayan. Selah
9 (10) Paykunata wanutsiy madianita runakunata unay wanutsinqaykinö.†
Paykunata ushakätsiy Sísaratapis Jabíntapis Cisón raqra ñöpancho ushakätsinqaykinö.†
10 (11) Endorchömi paykunata ushakätsirqayki.
Ayankunapis tsaychömi ismur ushakäyarqan.
11 (12) Paykuna respitayanqan runakunata wanutsiy Orebta y Zeebta wanutsinqaykinö.†
Mandaqnin reykunatapis wanutsiy Zebata y Zalmunata wanutsinqaykinö.†
12 (13) Paykunami rikatsiyämanqayki nacionta tsarikuyta munayarqan.
13 (14) Tayta Diosllä, shukukuy wayra imaykatapis ushanqannö conträ shäriq runakunata ushakaykatsillay.
Wayra apanqan tsaki päjanö kaykuyällätsun.
14 (15) Muntita nina rupar ushaqnö y jirkapa nina lätaypa lätar aywaqnö 15 (16) qampis mangäda tamyaykiwan qatikachay y shukukuy wayraykiwan mantsaritsiy.
16 (17) Paykunata pasaypa penqakuyman churaykullay.
Tayta Dios, munayyuq kanqaykita musyayänanpä tsaynö ruraykullay.
17 (18) Imaypis penqakushqa y mantsakashqa kayätsun.
Tsaynö puriykällar ushakäyätsun.
18 (19) Llapanpis musyaykuyällätsun qamlla poderyuq Tayta Dios kanqaykita.
Tantiyaykuyällätsun kay patsacho llapanpä munayyuq kanqaykita.