Salmo 103 (102)
Tayta Diosta alabanqan
(1a) David qellqanqan salmu.
1 (1b) Tayta Diostami llapan shonqüwan alabashä.
Llapan voluntänïwanmi santu jutinta joqarir agradëcikushä.
2 Tayta Diostami llapan shonqüwan alabashä.
Kuyapämar yanapamanqantaqa imaypis manami qonqäshätsu.
3 Paymi llapan jutsäpita perdonaman.
Imaykaläya qeshyapitami alliyätsiman.
4 Wanuypitapis paymi salvaman.
Kuyapämarmi imaykachöpis yanapaman.
5 Allinnin kaqkunatami kamaripäman.
Ankanö kallpayuq kanäpämi chölu kanqäman tikratsiman.
6 Muchuqkunata ñakatsiyaptin Tayta Diosmi janan shärin.†
7 Imanö kawanantsikpäpis Moiséstami musyatsirqan.
Ruranqankunatami Israel runakunata tantiyatsirqan.
8 Tayta Diosqa alli shonqu y kuyapäkuqmi.
Kuyakuq karmi jukllaqa ajanantsu.†
9 Manami kutin kutintsu castigamantsik.
Manami imayyaqpis ajashqatsu kanqa.
10 Manami jutsata ruranqantsikman tuputsu castigamantsik.
11 Kay patsapita ciëlu pasaypa altu kanqannömi paypita mantsapakuqkunapäqa kuyakuynin jatun kaykan.
12 Patsapa jukaq kuchunpita jukaq kuchunyaq jitariqnömi jutsantsiktapis karuman jitarishqa.
13 Tsurinta taytan kuyanqannömi paypita mantsapakuqkunata kuyan.
14 Imanö kanqantsiktapis musyanmi.
Allpallapita kanqantsiktami musyan.
15 Runakunaqa qewanö ushakaqllami kayan.
Waytanö shushuqllami kayan.
16 Achaq wayra shamurmi jachata ushakätsin.a
Ushakätsiptinmi maycho kanqanpis musyakannatsu.
17 Tayta Diospa kuyakuyninmi itsanqa mana ushakaq kaykan.
Paypita mantsapakuqkunataqa imaypis kuyanmi.
Paykunapa tsurinkunapä y willkankunapäpis allikunallatami ruran.†
18 Tsaynöllami yanapan ruranqan pactuta cumpliqkunata y mandamientunkunata cäsukuqkunata.
19 Ciëluchömi Tayta Diospa trönun.
Tsaypitami llapan kay patsacho kaqkunata mandaykämun.
20 Munayyuq angelkuna, Tayta Diosta alabayay.
Ninqanta cäsukuq kar payta alabayay.
21 Tayta Diosta sirviq y munanqanta ruraq angelkuna, payta alabayay.
22 Llapan kamanqankuna, maytsaychöpis payta alabayay.
Paytami llapan shonqüwan noqapis alabashä.†