Salmo 102 (101)
Llakikur mañakunqan
(1) Pasaypa ñakaycho kar Tayta Diosta mañakunqan.
1 (2) Tayta Dios, mañakamunqäta wiyaykallämay.
Qayakamunqäta chaskiykullay.
2 (3) Llakikunqä höra noqapita ama pakakuykullaytsu.
Rugakamuptï chaskiykallämay.
Mañakamunqäta juklla wiyaykallämay.
3 (4) Qoshni illakanqannömi kawaynïpis ushakaykan.
Imayka ninanörämi tullükunapis rupapan.
4 (5) Qewa wanupanqannömi shonqüpis aywapakaykan.
Manami mallaqänäpistsu.
5 (6) Waqaykaptillämi tullükunapis yuparkuyllapäna kaykan.
6 (7) Tsunyaqcho tukunömi kaykä.
Raqäkunacho chushiqnömi kaykä.
7 (8) Manami punuytapis tarïtsu.
Wayi janancho japallan pichuychankanömi kaykä.
8 (9) Chikimaqnïkunami mana jamaypa wajupäyäman.
Imay hörapis jutïta joqarirmi maldicionayäman.
9 (10) Mikunäpa trokinmi uchpa janallancho jamarä.
Yakutapis weqïtawanmi upuykä.
10 (11) Tsaynö kaykä ajarnin castigamaptikimi.
Joqarkamarmi tsapiramashqayki.
11 (12) Llantuy päsanqannömi kawaynï ushakaykan.
Qewa tsakinqannömi pasaypa tsakiykä.†
12 (13) Tayta Dios, qammi imayyaqpis rey kaykanki.
Qamtaqa imayyaqpis yarpäyäshunkimi.
13 (14) Siónta kuyapar janan shäriykullay.
Kuyapar perdonanaykipämi höra chämushqana.
14 (15) Sirvishuqnikikunaqa tsaycho kaq rumikunatapis kuyayanmi.
Raqällatana rikarmi pasaypa llakikuyan.
15 (16) Siónta kuyapaptikimi maytsay nacioncho taq runakuna respitayäshunki.
Kay patsacho llapan reykunami munayyuq kanqaykita tantiyayanqa.
16 (17) Tsaynömi tantiyayanqa Siónta yapay shäritsiptiki.
Tsayta rikarmi pïmaypis munayyuq kanqaykita musyayanqa.
17 (18) Pïninpis mana kaqkuna mañakayämunqanta wiyankimi.
Mañakayämushuptiki manami upa tukunkitsu.
18 (19) Qepa yuriqkunapis Tayta Diosta alabayänanpä pay ruranqankunata qellqashun.
19 (20) Tayta Diosmi ciëlucho kaykaq sagrädu wayinpita kay patsata rikamurqan
20 (21) waqaykaq prësukunata yanapananpä
y condenashqa runakunata wanuypita salvananpä.
21 (22) Tsaymi Tayta Diospa jutinta joqarir Sióncho adorayanqa.
Allita ruraq kanqanpitami Jerusaléncho alabayanqa.
22 (23) Tsaychömi llapan nación runakuna Tayta Diosta adorayänanpä qorikäyanqa.
23 (24) Tayta Diosmi kallpätapis ushakätsishqa.
Wallka watallana kawanäpämi kamakätsishqa.
24 (25) Tsaymi mañakur nirqä:
“Tayta Dios, chölullarä kaykaptïqa ama ari qorikamaytsu.
Qamqa mana ushakaypami kawaykanki.
25 (26) Kamanqayki hörami kay patsatapis shumaq takyätsishqayki.
Ciëlutapis makikiwanmi kamashqayki.
26 (27) Llapan kamanqayki ushakaptinpis qamqa imaypis kaykankimi.
Latsapa makwayaqnömi llapanpis ushakanqa.
Latsapata trukatsiqnöllami trukatsinki.
Trukaskatsirnaqa manami cäsunkinatsu.
27 (28) Llapan ushakaptinpis qamqa imaypis kanqaykinöllami kaykanki.
Qamqa manami imaypis awkinyankitsu.†
28 (29) Sirvishuqnikikunapita aywaraqkunataqa imaypis yanapankimi.
Paykunaqa ñöpaykichömi imaypis kawayanqa”.