Salmo 101 (100)
Tayta Diosta mandaq rey awninqan
(1a) David qellqanqan salmu.
1 (1b) Kuyakuq kanqaykipitami alabashayki.
Llapantapis allillata ruranqaykipitami alabashayki.
Tayta Dios, qamllatami alabashayki.
2 Munanqaykinömi kawayta munaykä.
¡Imayrä shamuykunki yanapamänaykipä!
Mandanqä palaciüchöpis allita rurarmi kawashä.
3 Mana allikunataqa rikaytapis manami munätsu.
Jutsa ruraqkunamanqa manami witipäshätsu.
Paykunawanqa manami takukäshätsu.
4 Llutan yarpaykuna shamuptinpis manami cäsupäshätsu.
Manami imaypis jutsata rurashänatsu.
5 Vecïnunpa wasan rimaqkunata upällatsishämi.
Runa tukuqkunataqa manami chaskipäshätsu.
6 Cäsukushuqniki runakunallatami yanapayämänanpä churashä.
Jutsata mana ruraqkunallami sirviyämanqa.
7 Trampösukunataqa palaciüman manami chaskishätsu.
Llullakuqkunapis ñöpäman manami witiyämunqatsu.
8 Cada tuta juzgarmi mana alli runakuna wanutsishqa kayänanpä nishä.
Tayta Dios akranqan markapitami paykunata illakätsishä.