Unay pactu imanö kanqan
9
Unay pactu kanqan witsanmi Sagrädu Tolduta imanö rurayänanpä y tsaycho payta imanö adorayänanpäpis runakunata Tayta Dios tantiyatsirqan. 2 Tsaymi Sagrädu Toldutaa ishkay cuartuyuqta rurayarqan. Punta kaq cuartuchömi karqan candelabru,† Tayta Diospä churayanqan tanta y tanta churakuna mësapis.† Tsay cuartupa jutinmi karqan Lugar Santu. 3 Ruri kaq cuartupa jutinmi karqan Lugar Santïsimu. Tsay ishkay cuartukunaqa rakta cortïnakunawanmi rakirarqan.†4 Lugar Santïsimuchömi karqan inciensiuwan qoshnitsiyänanpä qoripita rurashqa altar.† Tsaynöpis tsaychömi karqan Pactu Babul†. Tsay babulmi jananpa rurinpa qoriwan laqashqa karqan. Tsaychömi wiñararqan qoripita rurashqa tazón. Tsay tazonchömi maná ninqan mikuy† churararqan. Tsaynöpis tsay babulchömi wiñararqan Aarónpa sheqllimuq tukrun† y läja rumikunacho qellqashqa pactupis.† 5 Tsay babul tsapanan jananchönami kayarqan qoripita rurashqa chipipiykaq querubinkuna. Tsay querubinkunami babul janancho älankuna kichashqa kayarqan.† Maspis kaykanrämi tsaykunapita tantiyatsinäpä.
6 Sagrädu Tolduta ruraskiyaptinnami leykuna ninqannö llapanta rurayänanpä punta kaq cuartuman sacerdötikuna qoyay qoyay yaykuyaq.† 7 Lugar Santïsimumanmi itsanqa mandaq sacerdötilla watacho juk kuti yaykuq. Uywapa yawarninta aparkurmi kikinpa jutsanpita y runakuna mana tantiyakuypa jutsata rurayanqanpita perdonta mañakunanpä yaykuq.† 8 Lugar Santïsimuman mandaq sacerdötilla yaykuptinmi Espíritu Santu tantiyatsimantsik Sagrädu Toldu kaykanqanyaqb Tayta Diospa ñöpanman mana chänantsikpä kanqanta.
9 Tsaynö kaptinqa shumaq tantiyakushun: Tsaki mikuy ofrendakunata y uywakunata altarcho sacerdötikuna rupatsiyaptinpis manami tsaykunawanqa runakuna perdonta tariyantsu. 10 Unay pactuchöqa qellqaraykan imata mikunantsikpä imata mana mikunantsikpäpis,† imata upunantsikpä imata mana upunantsikpäpis† y imaykanöpa purificakunantsikpämi.† Tsaykunataqa runakuna cumpliyänan karqan Tayta Dios mushuq pactuta ruranqanyaqllami.
Mushuq pactu imanö kanqanpis
11 Mushuq pactuchöqa Jesucristunami mandaq sacerdöti kaykan. Payqa manami kay patsacho templumantsu yaykurqan, sinöqa kikin Tayta Dios ruranqan ciëlucho kaykaq templumanmi. 12 Kay patsacho sacerdötikunaqa cada watami chïvupa y becërrupa yawarninta aparkur Lugar Santïsimuman yaykuyaq. Jesucristuqa manami paykunanötsu yaykurqan, sinöqa ciëlucho kaykaq Lugar Santïsimuman yaykunanpä kikinpa yawarninta jicharmi juk kutilla yaykurqan. Tsaynöpami imayyaqpis salvashqa kanantsikpä rantimashqantsik.
13 Törukunapa y chïvukunapa yawarninwan runakunata tsaqtsuyaptin y ternërata rupatsiyanqan uchpata yakuman wiñarkur tsaqtsupäyaptinmi janallanpa runakuna purificashqa kayaq.† 14 Jesucristo yawarninta cruzcho jichashqa kaptinmi janantsikllapatsu purificashqa kaykantsik, sinöqa shonquntsikpis manakaqkunata ruranqantsikpitami purificashqana kaykan. Tsaynö purificashqa karmi imayyaqpis kawaq Tayta Diosta sirvintsik. Jesucristo Espíritu Santupa munayninwan Tayta Dios munanqan sacrificiunö kar noqantsik raykuq wanuptinmi tsaynö purificashqa kaykantsik.
15 Tsaymi mushuq pactuta Tayta Dios cumplinanpä Jesucristo garantiantsik kaykan. Paymi wanurqan unay pactuta mana cumplinqantsikpita perdonashqa kanantsikpä. Tsaynöpami llapanpis Tayta Dios qayanqan kaqkunaqa awninqan herenciata chaskiyanqa.
16 Tayta Dios ruranqan pactuqa testamentunömi. Testamentupis testakuq runa wanuptinrämi välin. 17 Testakuq manarä wanuptinqa testamentu manami välinrätsu. Wanuskiptinmi itsanqa välin.
18 Tsaynöllami punta kaq pactu välinanpäqa uywakunapa yawarninta jichayarqan. 19 Tsaymi runakuna qorikäyaptin leykunacho llapan mandamientukunata Moisés liyipaskir becërrukunapa y chïvukunapa yawarninta qorirqan. Tsay yawarman yakuta tallurkurmi hisöpu jachapa raprankunata puka jïluwan juk qeruman watarqan. Tsayta yawarman tullpurmi qellqaraykaq leykunata y llapan runakunatapis tsaqtsupar 20 nirqan: “Kay yawarqa noqantsikwan Tayta Dios pactuta ruranqan yawarmi kaykan”.†
21 Tsaynöllami Sagrädu Toldutapis y llapan manëjunkunatapis tsay yawarllawan Moisés tsaqtsuparqan.
22 Moisés qellqanqan leykunachömi nin purificashqa kananpäqa yawarwanrä imapis tsaqtsupashqa kananpä. Yawarta mana jichaptinqa manami runakunata jutsankunapita Tayta Dios perdonantsu.† 23 Tsaymi ciëlucho kaykaq templunö Sagrädu Toldutapis y llapan manëjunkunatapis uywapa yawarninwanrä purificarqan. Ciëlucho kaq templutami itsanqa mas väliq yawarwan purificarqan.
Jesucristo wanunqanpita Tayta Dios perdonamanqantsik
24 Ciëlucho templunö kaptinpis Jesucristo manami runa ruranqan templumantsu yaykurqan, tsaypa trokinqa ciëlumanmi. Kananqa Tayta Diospa ñöpanchömi noqantsikpä mañakuykan. 25 Tsayman yaykunanpä juk kutillami kikinpa yawarninta jichar wanurqan. Kay patsacho mandaq sacerdötiqa uywakunapa yawarninta apakurkur wata watami Lugar Santïsimuman yaykun. 26 Paykunanölla rurarqa kay patsata kamanqanpita kananyaqqa Jesucristo ayka kutirä wanunman karqan. Atska kuti wanunanpa trokinmi juk kutilla wanurqan. Jutsantsikpita perdonashqa kanantsikpämi kay ushanan tiempucho sacrificiunö kikin wanurqan.