Santiaguqa manami apóstol Santiagutsu karqan, sinöqa Jesucristupa wawqin kaqmi (Mar. 6.3; Gál. 1.19). Wanunqanpita Jesucristo manarä kawarimuptinqa manami criyirqanrätsu Tayta Dios kachamunqan Cristo kanqanta (Juan 7.5). Kawarimuptinrämi criyirqan. Tsaypitanami Santiaguqa apóstol Pedruwan y apóstol Juanwan Israel mayinkunata Jesucristupa willakuyninta yachatsirqan (Gál. 2.9). Pay yachatsinqankunami kay librucho qellqaraykan.

Kay libruchömi Santiago tantiyatsirqan imanö ñakarpis Tayta Diosman yärakur kushishqa kawayänanpä (Stg. 1.2-18), muchuqkunata alli rikayänanpä (Stg. 2.1-13), Tayta Diosman yärakur allikunata rurayänanpä (Stg. 2.14-26), imatapis llutankunata mana parlayänanpä (Stg. 3.1-12) y Tayta Diosman yärakur mañakuyänanpä (Stg. 5.13-18). Mas wakin yachatsikuykunami kay cartacho qellqaraykan.