Llutankunata mana parlanantsikpä ninqan
3
Kuyay wawqikuna panikuna, llutankunata yachatsiyaptikiqa Tayta Diosmi juzgayäshunki. Tsaynö kaykaptinqa qorikäyanqaykicho yachatsikuqllaqa llapayki ama kayaytsu.2 Pipis shiminta sujitakurqa jutsaynaqmi kanman. Tsay runaqa cuerpuntapis jutsa ruraypita sujitakunmanmi. Shimintsikta sujitakuyta mana kamäpakurqa llapantsikpis jutsatami rurantsik. 3 Musyanqantsiknöpis cawallupa shiminman bozalta churarkurmi munanqantsikpa puritsintsik. 4 Jatunkaray büquita wayra apaptinpis taksha timunllawanmi manijar munanqanpa apayan. 5 Upinaykaq ninapis tsariskirqa muntita ruparmi ushan. Tsaynöllami shimintsikpis takshalla kaykar imaykaman jitarpamantsik.†
6 Parlanqantsikpis imayka ninanömi kaykan.† Mana allikunata parlarmi alli kawakuq runatapis mana alli kawayman churantsik. Shimintsik takshalla kaykarpis dominamashqami pasaypa mana alli kawantsik. Nina imatapis rupar ushanqannömi mana alli parlanqantsikpis kaykan. Llutankunata parlarqa Satanás munanqantami ruraykantsik.
7 Ima uywatapis runakunaqa manshuyätsiyta yachayanmi: chucaru kaqkunata, pajaqkunata, culebrakunata y lamarcho kaqkunatapis. 8 Shiminkunatami itsanqa pipis dominayta kamäpakuntsu. Runapa shiminqa chucaru uywanö y venënunömi kaykan. 9 Tsay shimintsikwanmi Tayta Diosta alabantsik y runa mayintsikpa wasantapis rimantsik. Kikin niraqta Tayta Dios kamashqa kaykaptinqa manami tsaynö rimashwantsu.†
10 Tsay shimintsikwanmi allita y mana allitapis parlantsik. Kuyay wawqikuna panikuna, ama tsaynöqa kashuntsu. 11 ¿Juk pukyullapita pochquq yaku y mishkiq yaku yarqamunmantsurä? 12 ¿Hïgus jachapis aceitünasta wayunmantsurä? ¿Üvapis hïgusta wayunmantsurä? ¡Manami! Tsaynöpis juk pukyullapita pochquq yaku y mishkiq yaku manami yarqamuntsu. Tsaynö kaykaptinqa llutankunata parlanantsikpa trokin allillata parlashun.
Rasunpaypa yachaq kar imanö kawanantsikpäpis ninqan
13 Qamkuna kaqcho mayqanpis yachaq y tantiyakuq karqa mana yachaq tukullar allikunata ruratsun. Tsaynö kawaptinrämi yachaq kanqanpis musyakanqa. 14 Runa mayinta chikir shonquncho nanapararqa ama yarpätsuntsu yachaq kanqanta. Tsaynö alabakurqa manami rasun kaqtatsu parlaykantsik. 15 Yachaq tukuyqa manami Tayta Diospitatsu, sinöqa runapa yarpayninpita y Satanáspitami. 16 Chikinakur y nanaparänakur kawarqa pasaypa mana allimi kawantsik.
17 Tayta Dios yachayta qaramashqami itsanqa pay munanqannö kawantsik. Tsaymi pïmaywanpis alli kawantsik, kuyanakuntsik, alli shonqu kantsik, kuyapäkuntsik, allikunata imaypis rurantsik, pïmaytapis alli rikantsik y rasun kaqta parlantsik.† 18 Runa mayintsikwan alli kawanqantsikta rikarmi wakin runakunapis tantiyakuyanqa runa mayinwan alli kawayänanpä. Tsaynöpami llapantsikpis Tayta Dios munanqannö kawashun.