Jutsata mana ruranantsikpä ninqan
4
¿Imanirtä pelyallar y rimanakullar kawaykäyanki? Tsaynö kaykäyanki shonquykikunacho mana alli yarpay kaptinmi. 2 Wakinkunata imaykayuqpis kaqta rikarmi qamkunapis paykunanö kayta munayanki. Tsaymi imaykanöpapis tariyta munar runa mayikitapis wanuykätsiyanki. Tsaynö rurarpis Tayta Diosta mana mañakurmi munayanqaykita tariyankitsu. 3 Manakaqkunacho ushayänaykipä kaptinmi mañakurpis chaskiyankitsu.4 ¡Mana cäsukuq jutsasapa runakuna! ¿Manaku musyayanki mana allikunata rurar Tayta Diospa contran kayanqaykita? Pipis mana allikunata rurarqa Tayta Diospa contranmi kaykan. 5 ¿Manaku criyiyanki Tayta Diospa palabran ninqanta? Tsaychömi nimantsik mana allikunata rurashqa noqantsikman kachamunqan Espíritu Santu ajäkunqanta. 6 Tsaynö karpis kuyapämantsikmi. Tsaymi palabranchöpis nin:
“Yachaq tukuqkunataqa Tayta Dios manami yanapantsu.
Qollmi shonqu kaqkunatami itsanqa kuyapar yanapan”.†
7 Tsaynö kaykaptinqa mana yachaq tukuyllapa Tayta Dios ninqanta cäsukur diabluta ichipäyay.† Ichipäyaptikiqa qeshpirmi aywakunqa.
8 Tayta Dioswan imaypis kawayay. Tsaynö kawayaptikiqa paypis qamkunawanmi kaykanqa.
¡Jutsasapakuna! Makikikunata mayllakuyanqaykinö jutsa ruraykunata kachariyay. Janan shonqulla cäsukuyänaykipa trokinqa llapan shonquykikunawan Tayta Diosta cäsukuyay. 9 Jutsata rurayanqaykipita pasaypa llakikur waqayay. Asikuyänaykipa trokin waqayay. Kushikuyänaykipa trokin llakikuyay. 10 Tayta Diosta cäsukur mana yachaq tukuypa kawayay. Tsaynö kayaptikiqa yanapayäshunkimi.†
Pitapis manakaqman mana churanantsikpä ninqan
11 Wawqikuna panikuna, mayqaykikunapis manakaqman ama churanakuyaytsu. Pitapis manakaqman churarqa kuyanakunantsikpä nimanqantsik mandamientutami manakaqman churaykantsik. Tayta Diospa mandamientunqa manami manakaqman churanantsikpätsu, tsaypa trokinqa cäsukunantsikpämi.
12 Tayta Diosmi leyninkunata qaramashqantsik. Payllami jutsayuq o jutsaynaq kanqantsikta nimäshun. Payllami munayyuq kaykan salvamänantsikpä o condenamänantsikpäpis. Tsaynö kaykaptinqa ¿pitä qam kanki runa mayikita juzganaykipä?
Ima päsananpä kanqanta mana musyanqantsik
13 Wakikimi nikäyanki: “Waraykuna juklä markapa aywar tsaycho juk wata negociuta rurashun atska qellayta gänamunantsikpä”.
Tsaynö niqkuna, shumaq wiyayämay. 14 Manami musyantsiktsu waraykuna ima päsamänantsikpä kanqantapis.† Pukutay yuriskamur illakanqannöllami noqantsikpis illakäshun. 15 Tsaynö kaykaptinqa nishun: “Tayta Dios munaptin kawarqa imaykatapis rurashunmi”.