Manami musyantsiktsu kay libruta pï qellqanqantapis. Wakin runakuna yarpäyan Bernabé qellqanqanta (Hech. 4.36; 13.1-5), wakin runakunanami yarpäyan Apolos qellqanqanta (Hech. 18.24-25; 1Cor. 1.12; 3.4-8, 22-23) y wakinnami yarpäyan pillapis kay libruta qellqanqanta.

Kay libruta qellqanqan witsanmi Jesucristuman yärakuq Israel runakunata llutan yachatsikuqkuna niyarqan Jesucristuman yärakurpis Moisés qellqanqan leykunacho ninqannö sacrificiukunata rurayänanpä, reqishqa mikuykunallata mikuyänanpä y fiestakunatapis rurayänanpä.

Tsaynö yachatsiyaptinmi kay librucho yachatsimantsik Jesucristo llapanpitapis mas munayyuq kar mandaq sacerdöti kanqanta (Heb. 1.4—5.10; 7.1-28), Tayta Dios salvamänantsikpä mushuq pactuta ruraptin sacrificiukunata manana ruranantsikpä kanqanta (Heb. 8.1—10.18), Jesucristuman yärakurnintsik mana kacharinantsikpä kanqanta (Heb. 5.11—6.20; 10.19-39) y imanö ñakarpis payman yärakunantsikpä kanqanta (Heb. 11.1—12.29).