2 Corinto markacho^† Tayta Dios kuyanqan yärakuq mayikuna: Qamkunapämi Tayta Dios kaynö nirqan: “Paykunaqa Jesucristucho santumi kaykäyan”. Tsaynö kayaptikimi qayayäshushqayki pay munanqannö santu kawayänaykipä. Tsaynöllami maycho täyaptinpis payman llapan yärakuqkunata qayashqa. Tsaymi Jesucristuqa paykunapapis y noqantsikpapis Señornintsik kaykan. 3 Yayantsik Tayta Dios y Señor Jesucristo kuyapäyäshurniki alli kawayänaykipä yanapaykuyälläshuy.

4 Tayta Diostami qamkunapä imaypis agradëcikü. Jesucristuwan jukllayllanö kayaptikimi kuyapäshurniki imaypis yanapaykäyäshunki. 5 Llapanchöpis yanapayäshuptikimi tantiyakuykäyanki y alli willakuykäyanki. 6 Jesucristupa willakuyninman criyikuyänaykipä yanapayäshunqaykinöllami kananpis yanapaykäyäshunki. 7 Tsaymi Señor Jesucristo kutimunqanyaq shuyäyaptiki ima yachaynikikunapis pishïyäshunkitsu. 8 Paymi yanapaykäyäshunki kutimur pay munanqannö kawaykaqta tariyäshunaykipä. 9 Tayta Diosqa awninqanta imaypis cumplinmi. Paymi Tsurin Señornintsik Jesucristuwan jukllayllanö kawayänaykipä qayayäshushqayki.

10 Wawqikuna panikuna, Señor Jesucristupa jutinchömi qamkunata rugä mana chikinakuypa juk shonqulla y tsay yarpaylla kawayänaykipä. 11 Panintsik Cloé castakuna shamurmi willayämashqa kikikikunapura chikinakur rimanakur kawaykäyanqaykita. 12 Wakinnikishi noqata qatiräyämanqaykita nikäyanki, wakinnikishi Apolusta^† qatiräyanqaykita nikäyanki, wakinnikishi Cefasta^a qatiräyanqaykita nikäyanki y wakinnikinashi Jesucristuta qatiräyanqaykita nikäyanki.

13 Tsaynö nirqa llutantami nikäyanki. ¿Jesucristuqa atskaman rakikashqatsurä kaykan? ¿Noqatsurä qamkuna raykuq cruzcho wanushqä? ¿Noqapa jutïchötsurä bautizakuyashqayki? 14 Tayta Diostami agradëcikü qamkuna kaqcho kaykar Crisputa^† y Gayullata^† bautizanqäpita. 15 Tsaymi mayqaykipis niyankimantsu noqapa jutïcho bautizakuyanqaykita. 16 Tsaynöllami Estéfanas^† castallata bautizashqä. Tsaypita mastaqa manami pitapis bautizanqäta yarpätsu. 17 Manami runakunata bautizar purinäpätsu Jesucristo kachamashqa, tsaypa trokinqa alli willakuyninta willakur purinäpämi. Willakuyninta willakurqa manami yachaq kanqäta runakuna yarpäyänanpätsu willakü. Yachaq tukur willakurqa Jesucristo cruzcho wanunqantami manakaqman churäman.

18 Jesucristo cruzcho wanunqanta willakuptïmi infiernuman qaykushqa kayänanpä kaqkunaqa manakaqkunata willakunqäta niyan. Tsaynö niyaptinpis salvashqa kaqkunapäqa tsay willakuy Tayta Diospa munayninmi.^† 19 Tayta Diospa palabranchöpis kaynömi qellqaraykan:

20 Tsaynö kaykaptinqa yachaqkuna yachayanqanpis ¿imapätä välin?^† Ley yachatsiqkuna yachayanqanpis ¿imapätä välin? Kay patsacho yachaqkuna rimanakuyanqanpis ¿imapätä välin? Jesucristuman mana criyikuqkuna yachayanqanpis Tayta Diospäqa manakaqllami kaykan.^† 21 Paymi yachaq kar kamakätsirqan runakuna yachaq kayninwan payta mana reqiyänanpä. Tsaymi willakuynin manakaq kanqanta yarpäyaptinpis willakuyninman criyikuqkunatarä salvan.

22 Israel runakunaqa Jesucristuman criyikuyänanpä milagrukunatarämi rikayta munayan. Griego runakunanami yachaqkuna niyanqannö Diospa willakuynin kananta munayan. 23 Tsaynö munayaptinpis noqakunaqa Jesucristo noqantsik raykuq cruzcho wanunqantami willakuyä. Tsaynö willakuyaptïmi Israel runakuna ajanäyan.^b Mana Israel runakunanami manakaqkunata willakuyanqäta yarpäyan. 24 Tayta Dios qayanqan kaqkunami itsanqa Israel runa mana Israel runa karpis tantiyakuyan Jesucristo Tayta Diospa munaynin y yachaynin kanqanta.^c 25 Tsaymi willakuyanqä upa runakunallapä kanqanta yarpäyaptinpis yachaq runakunapa yarpayninpita mas alli kaykan. Tsaynöllami Jesucristo cruzcho wanunqanta manakaqman churayaptinpis payman yärakuqkunataqa Tayta Dios munayninwan salvaykan.

26 Wawqikuna panikuna, Tayta Dios qayayäshunqayki witsan imanö kayanqaykitapis yarpäyay. Qamkunacho juk ishkayllami yachaq kayarqayki, juk ishkayllami munayyuq kayarqayki y juk ishkayllami imaykayuq kayarqayki. 27 Mana yachaq kayanqaykita runakuna yarpäyaptinpis qamkunatami Tayta Dios akrayäshushqayki yachaqkuna tantiyakur penqakuyänanpä. Tsaynöllami munayniynaq kayanqaykita yarpäyaptinpis Tayta Dios akrayäshushqayki munayyuq runakuna tantiyakur penqakuyänanpä.^d 28 Manakaqman churayanqan runakunata salvananpä Tayta Dios tsaynö akraptinmi musyantsik pipis yachaq kayninpa ni munayyuq kayninpa mana salvakunanpä kanqanta. 29 Tsaymi Tayta Diospa ñöpancho pipis alabakunqatsu.

30 Qamkunataqa Jesucristucho kayänaykipämi Tayta Dios salvayäshushqayki. Noqantsik raykuqmi Jesucristuta Tayta Dios churarqan yachaynintsik kananpä, salvamaqnintsik kananpä, perdonamaqnintsik kananpä y rantimaqnintsik kananpä. 31 Tsaynö kaykaptinqa ama alabakushuntsu. Tayta Diospa palabranchöpis kaynömi qellqaraykan: “Pipis alabakunanpa trokinqa Tayta Diosta alabatsun”.^†