Jesucristo cruzcho wanunqanta Pablo willakunqan
2
Wawqikuna panikuna, qamkuna kaqman shamur manami yachaq runakuna parlayanqannötsu ni paykuna yarpäyanqannötsu Tayta Diospa willakuyninta yachatsishqä. 2 Tsaynö yachatsinäpa trokinqa Jesucristo noqantsik raykuq cruzcho wanunqantami yachatsishqä.3 Qamkunaman shamur mana tantiyatsinäpä kanqanta yarparmi pasaypa llakikushqä. 4 Yachaq runakuna parlayanqannö y yarpäyanqannö yachatsinäpa trokinqa Espíritu Santupa munayninwanmi yachatsishqä. 5 Tayta Diospa munayninwan yachatsiptï manami runakuna yachaq kayanqanmantsu yärakuykäyanki, sinöqa Tayta Diosmanmi.
Tayta Dios yarpanqankunata Espíritu Santu tantiyatsinqan
6 Yachaq runakuna yarpäyanqannö mana yachatsirpis Tayta Diospa willakuyninta shumaq tantiyakurmi payman yärakuqkunata yachatsï. Tayta Diospa willakuyninqa manami yachaq runakuna ni munayyuq runakuna yarpäyanqannötsu. Tsay runakunaqa ushakaqllami kayan. 7 Diospa yachayninta yachatsiyanqäqa runakuna mana musyayanqanmi kaykan. Tsay yachaynintami imapis manarä kaptin Tayta Dios kamakätsirqan gloriacho kushishqa kawanantsikpä. 8 Kay patsacho mandaqkunaqa manami mayqanpis tsayta tantiyayarqantsu. Tantiyarqa manami munayyuq Señor Jesucristuta cruzcho wanutsiyanmantsu karqan. 9 Mana tantiyayanqantami Tayta Diospa palabranchöpis kaynö qellqaraykan:
“Pipis mana rikanqanta,
mana wiyanqanta
y mana yarpanqantami
kuyaqninkunapä Tayta Dios kamarishqa”.†
10 Tsay kamarinqantaqa Espíritu Santuwanmi Tayta Dios musyatsimashqantsik. Espíritu Santu llapanta musyarmi Tayta Dios yarpanqankunatapis musyan. 11 Runa imata yarpanqantapis shonqun musyanqannömi Espíritu Santupis Tayta Dios imata yarpanqantapis musyan. 12 Noqantsikqa manami kay mundupa espïrituntatsu chaskishqantsika, sinöqa Tayta Dios kachamunqan Espíritu Santutami. Tsaynöpami musyantsik Tayta Dios salvamanqantsikta.
13 Qamkunataqa manami runakunapita yachakunqätatsu willaykä, sinöqa Espíritu Santu tantiyatsimanqantami. Tsaymi Espíritu Santuta chaskikushqa kayaptiki paypa yarpayninkunata tantiyaykätsï. 14 Espíritu Santuta mana chaskikuqkunaqa paypa yarpayninkunata manami chaskiyantsu. Paykunapäqa llutan yarpayllami kaykan. Espíritu Santu mana tantiyatsiptinmi tantiyayta kamäpakuyantsu. 15 Espíritu Santuta chaskiqkunami itsanqa yachatsinqankuna alli kanqanta tantiyar chaskikuyan. Imanir chaskikuyanqantapis wakinkunaqa manami tantiyayantsu. 16 Tayta Diospa palabranchöpis kaynömi nin:b
“Tayta Dios yarpanqankunata ¿pillaqa musyantsurä?
Yachaq kananpä ¿pillaqa payta yachatsintsurä?”†
Noqantsikmi itsanqa Jesucristo yarpanqannö yarpantsik.