Mana chikinakur kawayänanpä ninqan
3
Wawqikuna panikuna, tsaynö kaptinpis Espíritu Santu munanqannö mana kawayaptikimi Jesucristuman mana yärakuq runakunatanö qamkunata yachatsishqä. Qamkunaqa pishi wamranöllarämi kayashqayki. 2 Mikuyta manarä yachaq wamrata chuchullawan maman wätanqannömi noqapis qamkunata qallaykunan kaq yachatsikuykunallatarä yachatsishqä. Kananyaqpis mana tantiyakuq karmi pishi wamranöllarä kaykäyanki.† 3 Chikinakur y rimanakur kawar ¿manaku Jesucristuman mana yärakuq runakunanö kawaykäyanki? 4 Wakinnikishi nikäyanki: “Noqakuna Pablutami qatiräyä”. Y wakinnikinashi nikäyanki: “Noqakunaqa Apolustami qatiräyä”. Tsaynö nir ¿manaku Diosta mana cäsukuq runakunanö kaykäyanki?†5 Tsaynö niyänaykipäqa ¿pitä Apolos? Y noqapis ¿pitä kä? Noqakunaqa Tayta Diosta sirviq runakunallami kayä. Tayta Dios churayämanqannö sirviyaptïmi Jesucristuman criyikuyashqayki. 6 Murukuq runanömi qamkunata willashqä Jesucristuman criyikuyänaykipä.† Apolusnami murushqata qarpakuqnö Jesucristupa willakuyninta mas tantiyatsiyäshushqayki.† Muruta wiñatsimuqnömi Tayta Dios qamkunata shumaq tantiyatsiyäshushqayki Jesucristuman criyikuyänaykipä. 7 Manami muruq kaqtsu ni qarpaq kaqtsu muruta wiñatsimun, sinöqa Tayta Diosmi.
8 Muruq kaqpis qarpaq kaqpis chakra alli wayunanpämi arun. Tayta Diosnami muruq kaqtapis qarpaq kaqtapis aruyanqanman tupu päganqa. 9 Noqapis Apoluspis Tayta Diospa aruqninkunallami kayä. Qamkunanami Tayta Dios arutsinqan chakranö kaykäyanki.
Tsaynöpis Tayta Dios shäritsinqan wayinömi kaykäyanki. 10 Tayta Dios kuyamar churamashqa kaptinmi alli yachaq albañil churanqan cimientunö arunqäkuna kaykan. Tsay cimientu jananman juk albañil pirqata shäritsiqnömi wakin runakunapis aruyan. Itsanqa shumaq tantiyakuyätsun imanö aruyanqantapis. 11 Manami pipis cimientu churashqana kaykaqta jitaskir juk cimientuta churanmantsu. Jesucristumi cimientuqa kaykan.
12 Wakin runakunaqa Tayta Dios munanqannö kawar tsay cimientu jananman qoriwan, qellaywan o kuyayllapä chipikyaq rumikunawan wayita shäritsiqnömi kaykäyan. Wakinkunanami Tayta Diosta mana cäsukur qeruwan, oqshawan o llimllakunawanpis wayita shäritsiqnö kaykäyan. 13 Mayqanwan shäritsishqapis juiciu final junaqnami llapan arunqantsikpita Tayta Dios juzgamäshun. Tsay junaq juzgamarnintsikmi llapan ruranqantsikkunata ninawan probanqa. 14 Cimientu janancho shäritsinqantsikkunata nina mana ushaptinqa premiutami chaskishun. 15 Cimientu janancho shäritsinqantsikkunata nina ushaptinmi itsanqa ima premiutapis chaskishuntsu. Tsaynö kaptinmi wayita nina rupaptin runa qeshpir salvakunqannö noqantsikpis salvakushun.
16 ¿Manaku musyayanki Tayta Diospa templun kayanqaykita? ¿Manaku musyayanki Espíritu Santu qamkunacho taykanqanta?† 17 Tayta Diospa templunta ushakätsiq kaqtaqaa Tayta Diosmi ushakätsinqa. Qamkunaqa Tayta Diospa templun karmi santu kaykäyanki.
18 Shumaq tantiyakuyay. Wakinnikimi yarpäyanki Diosman mana criyikuq runakunanö yachaq kayanqaykita. Rasunpaypa yachaq kayta munarqa paykuna yarpäyanqannö ama yarpäyaytsu. 19 Diosman mana criyikuq runakuna yachaq kayanqanqa Tayta Diospä manakaqllami kaykan. Palabranchöpis kaynömi qellqaraykan:
“Yachaq kanqanta runa yarpaptinpis manami rasunpatsu yachaq kanqanta musyatsin”.†
20 Tsaynöpis kaynömi qellqaraykan:
“Tayta Dios musyaykanmi yachaqkuna imata yarpäyanqantapis.
Payqa musyaykanmi manakaqkunallaman umankuna churakashqa kayanqanta”.†
21 Tsaynö nikaptinqa ama alabakur niyaytsu “noqaqa Apoluspa o Pablupa qatiraqninmi kä” nir. Llapanpis qamkunapana kanqanta tantiyakuyay. 22 Tsaymi noqapis, Apoluspis, Cefaspis, kay patsapis, kawaypis, wanuypis, kanan tiempupis y shamunanpä kaq tiempupis qamkunapana llapan kaykan. 23 Qamkunanami Jesucristupa kayanki. Jesucristunami Tayta Diospa kaykan.