Wawqikunata panikunata yachatsinanpä apóstol Pablo munayyuq kanqan
4
Wawqikuna panikuna, Tayta Diospa willakuyninta willakur Jesucristupa sirviqnillan kayanqäta tantiyakuyay. 2 Alli sirviqqa yärakuypämi kanman. 3 Tsaymi Jesucristuta mana sirvinqäta yarpäyaptikipis o wakin runakuna tsaynö yarpäyaptinpis llakikütsu. 4 Noqapa tantiyaynïpitaqa Jesucristuta allimi sirviykä. Tsaynö kaptinpis manami alli sirvinqäta yarpanqäpitatsu Tayta Dios “allimi sirvimashqayki” nimanqa, sinöqa alli sirvinqäta kikin tantiyarmi.5 Tsaynö kaykaptinqa manaräpis hörancho pitapis ama juzgayaytsu. Señor Jesucristo kutimurnami pakayllapa ruranqantsikkunata y shonquntsikcho yarpanqantsikkunatapis juzgamäshun. Tsay hörami alli o mana alli sirviqnin kanqantsiktapis nimäshun.
6 Wawqikuna panikuna, Tayta Diospa palabran qellqaranqanta cäsukuyänaykipämi Apoluspä y kikïpä kay cartacho qellqamü. Cäsukurqa manami jukaq yachatsishuqnikipa janan shärir jukaqpa contran shäriyankimantsu.a Tsaynö rurarqa yachaq tukuykäyankimi. 7 Yachatsiyäshuqnikikunata tsaynö juzgayänaykipäqa ¿pitä kayanki? Tantiyaq kayanqaykipis ¿manaku Tayta Diospita kaykan? Tayta Diospitarämi llapantapis chaskiyashqayki. Tsaynö kaykaptinqa ¿imanirtä kikillaykikunapita tantiyaq kayanqaykita yarpar alabakuykäyanki?
8 Qamkunaqa llapan munayanqaykitami chaskiyashqayki ¿aw? Imaykayuqnami kaykäyanki ¿aw? Noqakuna manarä chäyämuptïpis Jesucristuwan mandaykäyanqaykitami yarpäyanki ¿aw? Mandar yanapayänäpä ¡allimi kanman rasunpaypa mandayaptikiqa!
9 Yarpaynïpitaqa llapanpitapis mas ñakayänäpämi apóstol kayman Tayta Dios churayämashqa. Noqakunataqa llutan ruraq runatanömi wanutsiyämayta munayan. Tsaynö ñakayanqätaqa llapan runakunapis angelkunapis rikaykäyämanmi. 10 Qamkunaqa Jesucristuta sirvir alläpa yachaq y tantiyaq kayanqaykitami nikäyanki. Noqakunatami itsanqa Jesucristuta sirviyaptï mana yachaqtanö rikayäman. Qamkunaqa puëdiq kayanqaykitami nikäyanki. Noqakunatami itsanqa imatapis rurayta mana puëdiqtanö rikayäman. Qamkunataqa allimi rikayäshunki. Noqakunatami itsanqa mana väliq runakunatanö rikayäman.
11 Kananyaqpis noqakunaqa mallaqar, yakunar, alätsikur y maqar ushashqami puriykäyä. Wayilläkunapis kikïkunapaqa manami kantsu. 12 Pishïpakurpis kikïkunami pishipäyanqäyaq aruyä.† Runakuna ashlliyämaptinpis Tayta Diostami mañakuyä bendicionninta qoykunanpä. Chikiyämaptinpis mana qallayaypami puriyä. 13 Wasäkunata rimayaptinpis alli shimïlläkunapami parlapäyä. Kananyaqpis pasaypa mana väliqtanö y manakaqtanömi rikayäman. 14 Manami qamkunata penqakuyman churanäpätsu tsaynö qellqaykämü, sinöqa kuyay tsurïtanö yätsirmi.
15 Chunka waranqa (10,000) yachatsishuqnikikuna kayaptinpis Jesucristuman criyikuyänaykipä jukllayllami puntata willayäshushqayki. Tsay willayäshuqnikiqa noqami kä. Tsaynöpami qamkunapa taytaykikunanö kaykä. 16 Tsaymi qamkunata yätsï noqa kawanqänö qamkunapis kawayänaykipä.† 17 Qamkuna kaqcho imanö kawanqätapis yarpätsiyäshunaykipämi Timoteuta kachamushqä. Payqa imayka kuyay tsurïnömi kaykan. Tsaynöpis payqa Tayta Dios munanqannömi kawan. Llapan iglesiakunachöpis yachatsinqänömi shumaq yachatsiyäshunki.
18 Wakinnikikunaqa mana kutimunäpä kaqta yarparshi pasaypa yachaq tukur kaykäyanki. 19 Tsaynö yarpäyaptikipis Tayta Dios munaptinqa watukakuq shamushämi. Tsaychönami tsay yachaq tukuqkuna musyayämanqa. Paykunaqa mä rasunpaypakush Tayta Diospa munayninwan ruraykäyan o kikinkunapa yarpayllanpitakush parlaykäyan. 20 Tayta Diospa mandakuynincho kawayqa manami yachaq tukur parlanqantsiktsu, sinöqa pay munanqanta rurar kawanqantsikmi. 21 Qamkunaqa ¿imanö chämunätatä munayanki? ¿Ajashqa chämunätaku o kushishqa chämunätaku?