Mädistanwan kakuq runata qarquyänanpä Pablo ninqan
5
Qamkunacho juk runa mädistanwan kakunqantami musyashqä. Paywan kakurqa penqakuypä fornicación jutsatami ruraykan. Tsaynö runataqa Jesucristuman mana criyikuq runakunapis pasaypami jamuräyan.† 2 Tsaynö kaykaptinqa ¿imanirtä penqakuyankitsu? Penqakuyänaykipa trokinqa kushikuykäyankimi. Tsay niraq runataqa ¿imanirtä qorikäyanqaykipita qarquyankitsu?3 Qamkuna kaqcho mana kaykarpis ñöpaykicho kaykaqnömi kaykä. Tsaymi tsay runataqa mayna juzgashqä. 4 Señor Jesucristupa jutincho qorikäyaptikimi noqapis qamkunawan kaykaqnö kaykäshä y munayyuq Jesucristupis qamkunawan kaykanqa. 5 Tsaynö kaykaptinqa tsay runata Satanáspa munayninman kachaykuyay. Tsaycho ñakar jutsanta jaqiriptinrämi Señor Jesucristo kutimur salvanqa.
6 Tsay runata mana qarqurqa alabakurpis mana allitami ruraykäyanki. ¿Manaku musyayanki tsay jutsaqa wallka levadüralla mäsata jakatsinqannö kanqanta?† 7 Tsaynö kaykaptinqa qamkunacho kaykaq levadürata jitariqnö tsay runata qarquyay. Tsaynöpami mushuq mäsapita rurashqa levadüraynaq tantanö kayanki.a Pascua carnishnö Jesucristo [noqantsik raykuq] wanutsishqa kaptinmi rasunpaypa levadüraynaq tantanö kayanki.† 8 Tsaynö kaykaptinqa Pascua fiestata rurayänanpä levadürata jitariqnö jutsa ruraykunata y mana alli ruraykunata kacharishun. Tsaynö kacharir Tayta Diospa willakuynin ninqannö kawashun.
9 Ñöpata cartakamunqächöpisb maynami nishqä fornicación jutsata ruraq runakunawan mana takukäyänaykipä. 10 Manami llapan tsaynö kawaq runakunapita witikuyänaykipätsu tsaynö nï. Tsaynöpis manami llapan imaykapäpis ayrajashqa runakunapita, suwakunapita y ïdulukunaman yärakuq runakunapita witikuyänaykipätsu nï. Paykunawan mana qorikarqa ¿mayparä aywayankiman? 11 Tsaynö kaptinpis wakin runakunaqa “Jesucristumanmi yärakü” nikarmi fornicación jutsacho kayan, imapäpis ayrajashqa kayan, ïdulukunaman yärakuyan, runapa wasanta rimayan, borrächu kayan y suwakuyan. Paykunawan mana takukäyänaykipämi nï. Paykunawanqa ama mikuyaypistsu.
12 Noqantsikqa manami munayyuqtsu kantsik Jesucristuman mana yärakuqkunata juzganantsikpä. Jesucristuman criyikuq mayintsikkuna jutsata rurayaptinmi itsanqa juzganantsikpä y corriginantsikpäpis munayyuq kaykantsik. 13 Jesucristuman mana criyikuq runakunataqa kikin Tayta Diosmi juzganqa. Jesucristuman criyikuq mayikikunata corrigiyänaykipä munayyuq kaykarqa mädistanwan kakuq runataqa qarquyay. Tsaynöpami mana alli ruraykuna qamkunacho kanqatsu.†