Autoridäkunaman mana demandanakuyänanpä ninqan
6
Qamkuna imallapitapis rimanakur ¿imanirtä Tayta Diospita mana mantsapakuq autoridäkunaman demandanakuyanki? ¿Imanirtä kikikikunapura arreglayankitsu? 2 ¿Manaku musyayanki Jesucristuman mana yärakuq runakunata juzganantsikpä Tayta Dios churamänantsikpä kanqanta? Tsaynö kaykaptinqa imapis kaptin ¿imanirtä kikikikunapura arreglayankitsu? 3 ¿Manaku musyayanki angelkunatapis juzganantsikpä kanqanta? Tsaynö kanantsikpä kaykaptinqa ¿imanirtä wawqikuna panikuna rimanakuyaptin arreglashwantsu? 4 Mayqan wawqiwan o paniwanpis rimanakur ¿imanirtä Jesucristuman mana yärakuq autoridäkunamanrä aywayanki? 5 ¿Manaku penqakuyanki? ¿Manaku qamkunacho pillapis kan Jesúsman yärakuqpura rimanakuyaptiki arreglayäshunaykipä? 6 Kikikikunapura arreglayänaykipa trokin Jesucristuman mana yärakuq autoridäkunamanrä demandakuq aywayanqayki manami allitsu.7 Yärakuqpura demandanakurqa mana allitami ruraykäyanki. Demandanakuyänaykipa trokinqa ajätsiyäshuptikipis ¿imanirtä upällakuyankitsu? Suwapäyäshuptikipis ¿imanirtä “jina apakutsunpis” niyankitsu? 8 Qamkunaqa kikikikunapura mana allita rurarmi suwapänakuykäyanki.
9 ¿Manaku musyayanki jutsa ruraq runakunaqa Tayta Diospa mandakuyninman mana yaykuyänanpä kayanqanta? Shumaq tantiyakuyay: fornicación jutsata ruraqkuna, ïdulukunaman yärakuqkuna, majanta qanrataqkuna, prostitüta warminö puriq chölukuna,a ollqupura kakuqkuna, 10 suwakuqkuna, imaykapäpis ayrajashqakuna, borrächukuna, wasarimakuna y sakyapakuqkunapis Tayta Diospa mandakuyninman manami yaykuyanqatsu.
11 Qamkunapis wakinnikiqa tsaynömi jutsata rurar kawayarqayki. Kananmi itsanqa Señor Jesucristupa jutincho Diosnintsikpa Espïritunwan jutsaykikunapita mayllashqana kaykäyanki, santuna kaykäyanki y jutsaynaqna kaykäyanki.
Fornicación jutsapita witikunantsikpä ninqan
12 Qamkunami nikäyanki munayanqaykita rurayänaykipä librina kaykäyanqaykita. Tsaynö kaptinpis manami llapantatsu rurayankiman.† Manami jutsata rurar kawanantsikpätsu libri kaykantsik, tsaypa trokinqa Tayta Dios munanqannö kawanantsikpämi. 13 Wakinnikiqa niyanki: “Mikuyqa pachantsikpämi y pachantsikpis mikuypämi”. Tayta Diosmi pachantsiktapis mikuytapis ushakätsinqa. Tsaynöpis cuerpuntsikqa manami fornicación jutsata ruranantsikpätsu kaykan, tsaypa trokinqa Señor Jesucristo munanqannö kawanantsikpämi. 14 Tayta Dios payta kawaritsimunqannömi noqantsiktapis munayninwan kawaritsimäshun.
15 ¿Manaku musyayanki Jesucristuwan jukllayllanö kayanqaykita? ¿Paywan jukllayllanö kaykartsurä prostitütawan kakuyankiman? Tsaynöqa ama kayaytsu. 16 ¿Manaku musyayanki juk runa prostitüta warmiwan kakurqa paywan juk cuerpunöllana kanqanta? Tayta Diospa palabranchöpis kaynömi qellqaraykan: “Tsaynö täkurnami ishkanpis jukllayllanö kayanqa”.† 17 Tsay ninqannöllami Jesucristuman yärakurqa Jesucristuwan jukllayllanöna kaykantsik.
18 ¡Fornicación jutsapita witikuyay! Wakin jutsakunata rurarqa manami cuerpuykitatsu qanrataykäyanki. Fornicación jutsata rurarmi itsanqa cuerpuykita qanrataykäyanki.