3 Runanta warmin cuerpunta ama michätsuntsu. Tsaynölla warminta runanpis cuerpunta ama michätsuntsu. 4 Warmipa cuerpun manami kikinpanatsu, sinöqa runanpanami. Y runanpa cuerpunpis manami kikinpanatsu, sinöqa warminpanami. 5 Tsaynö kaykaptinqa cuerpuykikunata ama michänakuyaytsu.

Wakinkunaqa warminwan willanakuyan Tayta Diosta mañakuyänan junaqkuna mana yatapänakuyänanpämi. Tsaynö willanakurqa willanakuyanqayki junaqyaqlla mana yatapänakuypa kayanki. Willanakuyanqayki junaq cumpliskiptin itsanqa majaykiwan yapay kakuyanki. Tsaynö mana rurayaptikiqa Satanásmi mayqaykitapis jutsaman ishkitsiyäshunki. 6 Manami majaykiwan punuyanqaykita michartsu tsaynö nikä, sinöqa wakinkuna tsaynö rurayta munayaptinmi.

7 Noqapa yarpaynïpitaqa mas allimi kanman llapaykipis noqanö kikillaykikuna kakuyaptiki. Imanö kaptinpis Tayta Diosmi kamakätsin wakinkuna warmiyuq kayänanpä y wakinkuna warmiynaq kayänanpä.

8 Warmiynaqkunata, runaynaqkunata y viüdakunatami noqa yätsï noqanö japallankuna kakuyänanpä. 9 Warmiynaq o runaynaq täkuyta mana kamäpakurqa warmin o runan ashikuyätsun. Jukwan jukwan kakuyänanpa trokinqa mas allimi kanman warmiyuq o runayuq kayaptin.

10 Warmiyuqkunata y runayuqkunatami Señor Jesucristo nirqan runanpita warmi mana rakikänanpä.^† 11 Tsaymi runanpita rakikarqa mana yapapakullar täkunan. Runayuq kayta munarqa runanwan amistatsun. Tsaynöllami runa kaqpis warminpita rakikänantsu.

12 Mayqan wawqipa warminpis rakikayta mana munaptinqa Jesucristuman mana yärakuptinpis warminpita ama rakikätsuntsu. Tsaypita Señor Jesucristo mana yachatsishqa kaptinpis mana rakikänanpämi tsaynö nï. 13 Tsaynölla mayqan panipa runanpis rakikayta mana munaptinqa Jesucristuman mana yärakuptinpis runanpita ama rakikätsuntsu.

14 Ama yarpäyaytsu Jesucristuman majayki mana yärakuq kaptin paywan täyanqayki mana alli kanqanta. Jesucristuman warmi yärakuptinqa runanwan täyanqan allimi. Tsaynöllami Jesucristuman runa yärakuptin warminwan täyanqan alli kaykan. Tsaynö mana kaptinqa wamrankunata Tayta Dios manami yanapanmantsu. Itsanqa wamrankunata kuyaparmi Tayta Dios yanapaykan.

15 Jesucristuman mana yärakuq warmi o runa rakikayta munarqa rakikäkutsun. Rakikaptinqa majan librinami kaykan paywan manana tänanpä. Tayta Dios manami munantsu majayuqkuna mana alli kawayänanta.

16 Wawqikuna, tantiyakuyay. Mana rakikaptikiqa capazchi warmiki tantiyakur salvakunqa. Panikuna, qamkunapis tantiyakuyay. Mana rakikaptikiqa capazchi runayki tantiyakur salvakunqa.

17 Maytsaychöpis wawqikunata panikunata kaynömi tantiyaykätsï. Salvayäshunaykipä Tayta Dios qayayäshuptikiqa señalakushqa o mana señalakushqa karpis, watay o libri karpis Tayta Diosta sirviyay.

18 Cuerpuykikuna señalakushqata qayayäshuptikiqa señalakushqalla kakuyay. Cuerpuykikuna mana señalakushqata qayayäshuptikiqa ama señalakuyaytsu. 19 Señalakushqa kayanqayki y mana señalakushqa kayanqaykipis Tayta Diospäqa iwalllami. Payqa munan imanö karpis mandamientunkunata cäsukur kawayänaykitami. 20 Salvayäshunaykipä Tayta Dios qayayäshuptiki señalakushqa o mana señalakushqa kayanqaykinölla kakuyay.

21 Watay kaykaqta qayayäshuptikipis ama llakikuyaytsu. Tsaynö kaptinpis watay kaykäyanqaykipita pillapis jipiyäshuptiki allimi kanman. 22 Jesucristo raykuq Tayta Dios qayayäshuptiki watay kashqa karpis Jesucristuman yärakurqa librinönami kaykäyanki. Tsaynöllami Tayta Dios qayayäshuptiki libri kashqa karpis Jesucristuta sirviyänaykipä paypa sirviqnin kaykäyanki. 23 Tayta Diosmi salvayäshurniki rantiyäshushqayki. Tsaynö kaykaptinqa señalakuyänaykipä niyäshuptiki o watay kayanqaykipita yarqukuyänaykipä niyäshuptiki ama cäsuyaytsu. Cäsurqa paykunapa wätayninnömi rikakuyanki.

24 Wawqikuna panikuna, tsaynö kaykaptinqa señalakushqa o mana señalakushqa karpis, watay o libri karpis Tayta Diosta sirviyay.

25 Kananqa japallan kaqkunapä willayäshayki. Paykunapäqa Señor Jesucristo manami imatapis parlakushqatsu. Tsaynö kaptinpis Tayta Dios kuyapämar yachayta qoykämaptinqa yätsinqäkunata chaskikuyänaykimi. 26 Kanan witsan alläpa ñakaykuna kaptin noqapa tantiyaynïpitaqa majaynaq kaqkunaqa japallan täkuyanman. 27 Majayuq karqa majaykipita ama rakikäyaytsu. Kikillayki karqa warmita ama ashiyaytsu. 28 Tsaynö kaptinpis warmita ashir manami jutsatatsu rurayanki. Tsaynöllami jipashpis majäkurqa jutsatatsu ruraykan. Majayuq karqa kanan witsan alläpa ñakaykuna kaptinmi masrä ñakayanqa. Tsaynö kananta manami munätsu.

29 Wawqikuna panikuna, kay patsa ushakänanpä wallkallanami pishin. Tsaynö kaykaptinqa majayuq karpis japallan kayanqannö kawayätsun.^a 30 Llakishqa karpis mana llakishqa kaykaqnö kawayätsun. Kushishqa karpis mana kushishqa kaykaqnö kawayätsun. Imata rantirpis tsaykunaman ama yärakuyätsuntsu.^b 31 Imaykayuq karpis tsaykunaman uman churakashqa ama kayätsuntsu. Kay rikaykanqantsik patsaqa ushakänanpänami kaykan.

32 Manami munätsu yarpachakur kawayänaykita. Warmiynaqkunaqa Señor Jesucristo munanqanta rurayänanpämi mas yarpachakuyan. 33 Warmiyuqkunami itsanqa warminwan alli kawayänanpä mas yarpachakuyan. 34 Tsaynö karqa warminta alli rikayänanpä y Jesucristuta sirviyänanpämi yarpachakuyan.

Tsaynöllami viüdakunapis^c y jipashkunapis Señor Jesucristo munanqannö llapanchöpis santu kawayänanpä yarpachakuyan. Runayuq warmikunami itsanqa runanwan alli kawayänanpä mas yarpachakuyan. 35 Tsayta nikä manami majayuq kayänaykita michartsu, sinöqa majayuq kayänaykipä o majaynaq kayänaykipäpis shumaq yarpachakuyänaykita munarmi. Tsaynöllami munaykä shumaq kawar Señor Jesucristuta llapan shonquykikunawan sirviyänaykita.

36 Pï runapa warmi tsurinpis runayuq kananpä edäninchöna kaptinqa y runayuq kayta munaptinqa majatsakätsun. Majatsakarqa manami jutsatatsu rurayan. 37 Tsaynö kaptinpis majatsakätsiyta mana munarqa ama majatsakätsitsuntsu. Itsanqa manami pipis majayuq kananpä o majaynaq kananpäpis obliganmantsu. 38 Tsaymi tsurinta majatsakätsir allita rurayan. Tsaynö kaptinpis majaynaq kananta mana munar mas allitami rurayan.

39 Runayuq warmi runan kawanqanyaqqa [ley ninqannölla] runallanwanmi täyanman. Runan wanuskiptinmi itsanqa jukwan tänanpä librina kaykan. Tsaynö kaptinpis Jesucristuman mana yärakuq runawanqa manami tanmantsu. 40 Tänanpä libri kaptinpis noqapa yarpaynïpitaqa viüda mananami yapapakunmannatsu. Tsaynö nï noqapis Espíritu Santuta chaskikushqa karmi.