Ïdulukunapä pishtayanqan aytsapita yachatsinqan
8
Ïdulukunapä pishtayanqan aytsakunapita tapuyämanqaykita kanan willayäshayki.a Musyämi “llapäkunami yachaq kayä” niyanqaykita. Tsaynö niyaptikipis wakin yachaqkunaqa orgullösumi kayan. Kuyapäkuq kaqkunami itsanqa runa mayinta alli yanapayan. 2 Yachaq kayanqaykita yarparpis manami rasunpaypatsu yachaq kayanki. 3 Rasunpaypa yachaq runaqa Tayta Diostami kuyan. Tsaynö runataqa Tayta Diospis reqinmi.4 Ïdulukunapä pishtayanqan uywakunata mikunantsikpä o mana mikunantsikpä kanqantapis kanan tantiyatsiyäshayki. Musyanqantsiknöpis ïdulukunaqa manami kawayantsu ni munayyuqtsu kayan. Tsaynöpis musyantsikmi Tayta Dios jukllaylla kanqanta. 5 Tsaynö kaptinpis wakin runakuna yarpäyan ciëluchöpis y kay patsachöpis atska dioskuna kayanqantami. 6 Tsaynö yarpäyaptinpis noqantsikpäqa jukllayllami Diosqa. Payqa Tayta Diosmi. Paymi llapantapis kamashqa. Noqantsikpis payta sirvinantsikpämi kawantsik. Señor Jesucristupis jukllayllami. Paywanmi Tayta Dios llapantapis kamarqan. Paymi kawaytapis qaramantsik.†
7 Tsaynö kaptinpis manami llapan wawqikuna y panikunatsu tsaykunata tantiyayan. Wakinkunaqa ïdulukunata ñöpata adorashqa karmi ïdulukunapä pishtayanqan aytsata mikuyta munayannatsu. Tsay aytsata mikurqa jutsata rurayanqantami yarpäyan.
8 Manami aytsata mikunqantsikpitatsu Tayta Dios mas kuyamantsik y aytsata mana mikunqantsikpitatsu mënus kuyamantsik, sinöqa mikushqapis mana mikushqapis iwalllami kuyamantsik. 9 Ïdulupä pishtayanqan aytsata mikuyänaykipä libri kaykarpis paqtä mikur manarä shumaq tantiyaq wawqikunata y panikunata jutsata ruratsiyankiman.
10 Yachaq kayanqaykita yarparmi wakinnikiqa ïdulukunapa templuncho aytsata mikuykäyanki. Tsay aytsata mikuykaqta rikayäshurniki ¿manatsurä manarä shumaq tantiyaq wawqikuna panikunapis tsay aytsata mikuyta munayanqa? 11 Tsaynöpami yachaq kayanqaykita yarparpis tsay wawqikunata panikunata jutsata ruraykätsiyanki. Tsaynö jutsata ruraykätsiyanki paykuna raykuq Jesucristo wanushqa kaykaptinmi. 12 Mana tantiyaq wawqikunata panikunata tsaynö jutsata ruratsirqa Jesucristupa contranmi ruraykäyanki.† 13 Aytsata mikunqantsikpita yärakuq mayintsik ïduluta yapay adoraptinqa aytsata imaypis ama mikushunnatsu.