Mañakunanpä derëchun kaptinpis Pablo mana mañakunqan
9
¿Manaku libri kaykä? ¿Manaku apostolpis kaykä? ¿Manaku Señor Jesucristutapis rikashqä?† ¿Manaku qamkunapis willaptïrä Jesucristuman criyikuyashqayki? 2 Wakinkuna apóstol kanqäta mana tantiyayaptinpis qamkunami itsanqa musyayanki. Tsaymi willakunqäta criyir Jesucristuman yärakuykäyanki. 3 Apóstol kanqäta manakaqman churamaqkuna musyayänanpämi tsaynö nï.4 Apóstol karmi noqakunapis willakuyanqäpita mikuyänäpä y upuyänäpä derëchükuna kan. 5 Wakin apostolkuna, Señor Jesucristupa wawqinkuna y Cefasa warminkunawan puriyanqannömi noqakunapis warmïkunawan puriyänäpä derëchükuna kan. 6 ¿Imanirtä yarpäyanki Bernabétawan noqata mana yanapayämänaykipä kanqanta? 7 ¿Mayqan soldädutä kikinpa gastunwan soldädu kayman yaykun? ¿Pï runatä plantanqan üvapa wayuyninta mikuntsu? Tsaynöpis ¿pï runatä mitsinqan cabranpa o wäkanpa lichinta upuntsu?b
8 Tsaytaqa manami kikïpa yarpaylläpitatsu nï. Moisés qellqanqan leykunachöpis tsaypäqa qellqaraykanmi. 9 Tsaychömi kaynö qellqaraykan: “Ëracho trïguta trillar töruta ama shenqawayankitsu”.†
Tayta Dios tsaynö nirqan ¿törukunapäku 10 o noqantsikpäku? Tsaynö qellqaraykan noqantsikpämi. Töruwan arupakuqpis trïguta trillapakuqpis qarayta chaskinan raykuqmi arupakuyan. 11 Noqakunapis Jesucristupa willakuyninta qamkunata willar muruta imayka muruqnömi kayashqä. Tsaymi cosëchacho qarayta chaskiqnö qamkunapita imallatapis chaskiyäman. 12 Wakintapis yanapaykarqa noqakunata masrämi yanapayämankiman.
Yanapayämänayki kaykaptinpis manami qamkunata mañakuyashqätsu. Tsaypa trokinqa Jesucristupa willakuyninta chaskiyänaykipä ima tsapapis kananta mana munarmi ñakarpis upällakuyashqä. 13 ¿Manaku musyayanki templucho y altarcho aruqkunaqa templuman apayanqan mikuypita mikuyanqanta?† 14 Tsaynöllami Jesucristupa willakuyninta willakuqkunapis willakuyanqanpita chaskiyanman. Tsaynö kananpämi Señor Jesucristupis nirqan.†
15 Tsaynö chaskinäpä derëchü kaptinpis manami imaypis mañakushqätsu ni kananpis manami mañakuykätsu. Noqapa tantiyaynïpitaqa mañakunäpa trokin jina wanukümanpis. Mana mañakunqäpita manami llakikütsu, sinöqa kushikümi.
16 Jesucristupa alli willakuyninta imaykanöpapis willakunä kaptinmi willakunqäpita alabakütsu. Mana willakuptïqa ¡Tayta Dios castigamätsun!† 17 Kikïpa yarpaylläpita willakurqa yanapamänaykipä mañakümanmi. Tayta Dios willakunäpä churamashqa kaptinmi mana mañakuyllapa willakuykä.
18 [Jesucristupa] alli willakuyninta willakunqäpita qellayta mana chaskiptïpis jukmi pägü kaykan. Tsay pägüqa kaykan willakunqäpita mañakunäpä derëchü kaykaptinpis mana mañakuyllapa willakunqämi.
19 Noqa libri karpis runakuna tantiyakur salvakuyänanpämi llapan runakunapa wätayninnö kaykä. 20 Tsaymi Israel runakunawan qorikarqa paykuna kawayanqannö noqapis kawä. Moisés qellqanqan leykunata paykuna cumpliyanqannömi noqapis cumplï. Tsay leykunapa munaynincho mana karpis tsaynö kawä Israel runakuna tantiyakur Jesucristuman criyikuyänan raykuqmi.
21 Tsaynöllami Moisés qellqanqan leykunata mana cäsukuq runakunawan qorikarpis paykuna kawayanqannö kawä. Tsaynö kawä paykunapis Jesucristuman criyikuyänan raykuqmi. Paykunawan qorikar Moisés qellqanqan leykunata mana cumplirpis jutsata mana ruraypami Jesucristo munanqannölla kawaykä.
22 Tsaynöllami mana tantiyaqkunawan qorikarpis paykuna kawayanqannö noqapis kawä.† Tsaynö kawä Jesucristuman criyikuyänan raykuqmi. Tsaynöpami runa imanö kaptinpis tsay runanö kawä. Tsaynö kawä wakillanpis salvakuyänanpämi. 23 Llapantapis rurä Jesucristupa alli willakuyninta runakuna chaskikuyänan raykuqmi. Tsaynöpami Jesucristuman criyikur kushikuyanqannö noqapis kushikushä.
24 Qamkuna musyayankimi atskaq cörrirpis alli cörriq kaqlla premiuta chaskinqanta. Qamkunapis Tayta Diospita premiuta chaskiyänaykipä shumaq kawayay. 25 Cörriqkuna shumaq kamarikuyanqanta tantiyakuyay. Paykuna tsaynö kamarikuyan gänar ushakaq corönata chaskiyänallanpämi. Noqantsikmi itsanqa kamarikuykantsik mana ushakaq corönata chaskinantsikpä. 26 Tsaymi llallinakuycho pantar jukläpa cörriq runanötsu ni pelyacho wayrallata kutaq runanötsu kawä. 27 Tsaypa trokinqa cörrinanpä kamarikuq runa imanö ñakarpis kamarikuyanqannömi noqapis Tayta Dios munanqannö imanö ñakarpis kawaykä. Mana tsaynö karqa wakinta shumaq yachatsirpis Diospa ñöpanman manachi kikïpis chämantsu.