Ïdulukunata mana adorayänanpä yachatsinqan
10
Wawqikuna panikuna, musyayankimi unay yärakuq mayintsikkunata ima päsanqantapis. Paykunaqa pukutay rurillantami aywayarqan† y Puka Lamartami päsayarqan.† 2 Moiséswan pukutay rurinpa aywashqa karmi y lamarpa päsashqa karmi llapanpis bautizakushqanö kayarqan. 3 Tayta Dios kamaripanqan mikuytapis llapanmi mikuyarqan.† 4 Tayta Dios qaqapita pashtatsimunqan yakutapis llapanmi upuyarqan.† Tsay qaqaqa Jesucristumi karqan. Israel runakuna aywayanqanmanmi Jesucristupis aywarqan. 5 Tsaynö kaptinpis atskaqmi Tayta Diosta cäsukuyarqantsu. Tsaymi paykunaqa tsunyaq jirkacho wanushqa mashtaraykar quëdayarqan.† 6 Llapan tsaykuna päsarqan noqantsik tantiyakur paykunanö jutsata mana ruranantsikpämi.7 Tsaynö kaykaptinqa ïdulukunata ama adorashuntsu. Israel runakuna ïdulukunata adorayanqanpita Tayta Diospa palabrancho kaynömi qellqaraykan:
“Llapanmi jamaykur mikuyarqan y upyayarqan.
Kushikurmi jukninpis jukninpis jutsata rurar kakuyarqan”.†
8 Tsaynöpis fornicación jutsata ama rurashuntsu. Israel runakuna tsaynö kawayanqanpitami Tayta Dios juk junaqllacho ishkay chunka kimsa waranqa (23,000) runakunata ushakätsirqan.†
9 Tsaynöpis Señornintsik Jesucristuta kikintsik munanqantsikta rurananta ama munashuntsu. Wakin Israel runakuna Diosta tsaynö ruratsiyta munayaptinmi culebrawan kanitsir Tayta Dios ushakätsirqan.†
10 Tsaynöpis descontentu ama kashuntsu. Israel runakuna descontentu kayaptinmi wanutsikuq ángel paykunata ushakätsirqan.†
11 Unay Israel runakunata tsaynö päsanqankunami Tayta Diospa palabrancho qellqaraykan ushanan tiempucho noqantsik kawaqkuna tantiyakunantsikpä. 12 Tsaynö kaykaptinqa paqtä Tayta Dios munanqannö alli kawaykäyanqaykita yarpar jutsata rurayankiman. 13 Llapan pruëbakuna päsayäshunqayki wakin runakunatapis päsanmi. Pruebaman churayäshurnikipis Tayta Dios manami kachariyäshunkitsu. Tsaymi pruëbakunata awantar jutsaman mana ishkiyänaykipä imaypis yanapayäshunki.†
14 Kuyay wawqikuna panikuna, tsaynö kaykaptinqa ïdulukunata ama adorayaytsu. 15 Tantiyakuq runakuna kaykarqa ninqä rasunpaypa kanqanta tantiyakuyay. 16 Santa Cënapä noqantsik qorikar bendición cöpapitaa upur ¿manaku yarpantsik Jesucristo noqantsik raykuq yawarninta jichanqanta? Tsaynöpis tantata pakipänakur ¿manaku yarpantsik Tayta Dios salvamänantsikpä Jesucristo cruzcho wanunqanta?† 17 Santa Cënacho juk tantallata mikur atskaq karpis juk cuerpullami kantsik. 18 Israel runakunapa sacerdötinkunapis Tayta Diosta adorakuyänan altarcho pishtayanqan aytsata mikur ¿manaku Tayta Dioswan jukllayllanö kaykäyan?
19 Shumaq tantiyakushun. Ïdulukunaqa manami kawantsu. Ïdulukunapä altarman churayanqan aytsapis kanqan aytsallami. 20 Tsaynö kaptinpis ïdulukunapä churayanqan aytsaqa manami Tayta Diospätsu, sinöqa supaykunapämi. Noqaqa manami munätsu supaykunapä kaqkunata mikuyänaykita.† 21 Qamkunaqa Santa Cënacho vïnuta upurnin supaykunapä jichayanqan vïnutapis manami upuyankimantsu. Tsaynöpis Santa Cënacho tantata mikurnin supaykunapä churayanqan mikuytapis manami mikuyankimantsu.† 22 ¿Tayta Diosta ajanätsiytaku munaykäyanki? ¿Paypita mas munayyuqku noqantsik kantsik?†
Tayta Dios alabashqa kananpä imatapis ruranantsikpä ninqan
23 Munayanqaykita rurayänaykipä librina kayanqaykita nirpis manami llapantatsu rurayankiman. Tsaynöpis manami llapan rurayanqaykikunatsu wawqikuna panikuna alli kawayänanpä yanapan.† 24 Kikillantsik alli kawanantsikpäqa ama yarpachakushuntsu, sinöqa wakinkunapis alli kawayänanpä yarpachakushun.
25 Mercäducho aytsata rantirqa ïdulukunapä pishtayanqanta o mana pishtayanqantapis mana tapukullar rantiyay. Rantirpis ama yarpachakuyaytsu. 26 Tayta Diospa palabranchömi nin: “Tayta Diospami kay patsapis y kay patsacho kaqkunapis”.†
27 Tsaynöpis Tayta Diosman mana yärakuq runa mikuyänaykipä qayatsiyäshuptiki mana tapukullar llapan qarashunqaykita mikuyay. 28 Itsanqa pipis “tsay aytsataqa ïdulupämi churashqa” nishuptikiqa tsay willashuqnikita respitar ama mikuyaytsu. 29 Manami kikikikuna raykuqtsu mana mikuyänaykipä nï, sinöqa willashuqniki runa llutanta mana yarpänanpämi.†
Tsaynö niptï capaz wakinniki niyankiman: “Runakuna llutanta yarpäyaptillanqa ¿imanirtä aytsata mikümantsu? 30 Tayta Diosta agradëcikuskir mikuptïqa manami pipis manakaqman churayämanmantsu”.
31 Tsaynö niyaptikipis noqami nï: Mikurpis, upurpis y imata rurarpis Tayta Dios alabashqa kananpä rurayanki. 32 Tsaynö kaykaptinqa Israel runa kaptinpis, mana Israel runa kaptinpis, Diosman criyikuq mayiki kaptinpis rurayanqaykita rikar Diosman criyikuyanqanta kachariyänan kaptinqa tsay rurayanqaykita amana rurayankinatsu. 33 Noqapis manami kikilläpätsu alli kawayta munaykä, sinöqa llapanchöpis runa mayï alli kawayänantami munaykä tsaynöpa atskaq salvakuyänanpä.