5
Mandaq sacerdötitaqa Tayta Diosmi akran tsaki mikuy ofrendakunata y sacrificiukunata altarcho rupatsiptin jutsankunapita runakuna perdonashqa kayänanpä. 2 Sacerdötiqa runalla kar imachöpis jutsata rurarmi runa mayinkuna mana tantiyakuypa jutsata rurayaptin kuyapan. 3 Tsaymi kikinpa jutsankunapita y runa mayinkunapa jutsankunapita sacrificiuta rupatsin.†4 Kikinpa munayllanpitaqa manami pipis mandaq sacerdöti kayman yaykuntsu. Tsaypa trokinqa Tayta Dios churaptinrämi mandaq sacerdöti kayman pipis yaykun. Aarónpis Tayta Dios churaptinrämi mandaq sacerdöti karqan.† 5 Jesucristupis manami kikinpa munayllanpitatsu mandaq sacerdöti karqan, tsaypa trokinqa Tayta Dios churaptinrämi. Paytami Tayta Dios nirqan: “Qamqa tsurïmi kanki. Kanan junaqpitami taytayki kä”.a † 6 Tayta Diosmi palabrancho mastapis nirqan: “Qammi imayyaqpis Melquisedecnö sacerdöti kanki”.†
7 Jesucristo kay patsacho kawanqan witsan waqayparä y qayakuyparämi Tayta Diosta mañakurqan. Tsaynö mañakurqan wanuypita salvananpä Tayta Dios munayyuq kanqanta musyarmi. Tayta Dios ninqanta Jesucristo cumpliptinmi rugakunqanta wiyarqan. 8 Tayta Diospa Tsurin karpis ñakarrämi cäsukuyta yachakurqan.b † 9 Tsaynö yachakurmi munayyuq kaykan payta cäsukuqkunata salvananpä. 10 Tsaymi Tayta Dios payta churarqan Melquisedecnö mandaq sacerdöti kananpä.
Yärakuyninkunata mana kachariyänanpä ninqan
11 Kaykunapita tantiyatsinäpäqa atskarämi kaykan. Tsaynö kaptinpis ajatarä tantiyayaptikimi mastaqa yachatsiyta kamäpakütsu. 12 Kananyaqqa maynami yachatsikuq kaykäyankiman. Tsaynö kaptinpis qallaykunanpitarämi yapay yachakuyta munaykäyanki. Pishi wamra mikuyta manarä yachakur lichillatarä chuchuqnömi kaykäyanki. 13 Chuchuykaq wamranö karmi tantiyakuyankirätsu Tayta Dios munanqannö kawayänaykipä kanqanta.† 14 Qamkunaqa mikuyta mikuqnöna kayankiman. Tsaynö karqa alli kaqta y mana alli kaqta tantiyarmi Tayta Dios munanqannö kawayanki.