Tayta Dios awninqan jamayman yaykunantsikpä kanqan
4
Unay Israel runakunata jamayman yaykatsinanpä awninqannöllami noqantsiktapis Tayta Dios nimantsik jamayman yaykatsimänantsikpä kanqanta.a Tsaynö awniykämashqaqa paqtä payta mana cäsukur tsay jamayman yaykushwantsu.2 Unay Israel runakuna Tayta Diospa willakuyninta musyayanqannömi noqantsikpis musyantsik. Tsay runakunaqa musyaykarpis mana yärakuyanqanpitami Tayta Dios awninqan jamayman yaykuyarqantsu. 3 Noqantsikmi itsanqa payman yärakur awnimanqantsik jamayman yaykushun. Mana yärakuqkunapämi Tayta Dios nirqan: “Ajanarmi jurar nirqä: ‘Paykunaqa awninqä jamayman manami yaykuyanqatsu’ ”.†
Mana yärakuqkuna Tayta Dios awninqan jamayman mana yaykuyaptinpis kay patsata kamanqanpita patsami tsay jamayman yaykunantsikpä kamarishqa kaykan. 4 Kamarishqa kaykanqanta musyantsik qanchis kaq junaqpä palabrancho niptinmi: “Llapanta kamayta ushaskirmi qanchis kaq junaqcho Tayta Dios jamarqan”.†
5 Mastapis kaynömi nin: “Paykunaqa awninqä jamayman manami yaykuyanqatsu”.†
6 Tsay ninqannöllami unay Israel runakuna Tayta Diospa willakuyninman yärakuykarpis mana cäsukuq kar tsay jamayman yaykuyarqantsu. Tsaynö kaptinpis tsay jamay kaykanrämi yaykunantsikpä. 7 Tsay jamayman yaykunantsikpämi Tayta Dios tantiyatsiptin David nirqan: “Tayta Dios ninqanta kanan junaq wiyaykarqa chukru shonqu ama kayaytsu”.†
8 Israel runakunata Canaánman pusharpis Josuéqa manami paykunata jamayman yaykatsirqantsu.† Yaykatsishqa kaptinqa Tayta Dios manami yapayqa parlanmantsu karqan. 9 Tsaymi Tayta Diosman yärakuq runakunapäqa kaykanrä jamayman yaykuyänanpä. 10 Kay patsata kamayta ushaskir Tayta Dios jamanqannömi noqantsikpis tsay jamayman yaykur llapan ñakanqantsikkunapita jamashun. 11 Tsaynö kaykaptinqa Tayta Dios kamarinqan jamayman yaykunantsikpä yarpachakushun. Israel runakunanö mana wiyakuq karqa noqantsikpis manami yaykushuntsu.
12 Tayta Diospa palabran kawaq karmi munayyuq kaykan. Ishkanläpa alli afilashqa espädapitapis mas fïlu karmi† shonquntsikmanpis, yarpaynintsikmanpis y toqshuntsikmanpis chan imanö kanqantsiktapis tantiyatsimänantsikpä. 13 Llapan kamanqankuna ñawillancho kaptinmi Tayta Diospita pakakuyta kamäpakuntsiktsu. Imata rurashqapis payqa rikaykämantsikmi. Imanöpis kawanqantsikman tupumi payta cuentata qoshun.
Mandaq sacerdöti Jesucristo kanqan
14 Tayta Diospa Tsurin Jesucristo gloriacho mandaq sacerdöti kaykaptinqa payman imaypis yärakushun. 15 Kay patsacho kaptinmi mandaq sacerdötintsik Jesucristuta noqantsiktanö Satanás imaykanöpa tentarqan. Tsaynö tentaptinpis manami jutsata rurarqantsu. Tsaymi noqantsiktapis Satanás tentamashqa kuyapämarnintsik Jesucristo yanapamantsik. 16 Imaypis yanapamänantsikpä kaykaptinqa kuyapäkuq Tayta Diosta mana mantsariypa mañakushun. Payta mañakurqa trönuncho paywan parlaykaqnömi kaykantsik. Tayta Diosta mañakushqaqa ima ñakaycho kashqapis paymi kuyapämarnintsik yanapamäshun.