Moiséspitapis Jesucristo mas munayyuq kanqan
3
Wawqikuna panikuna, gloriaman chäyänaykipä Tayta Dios qayaykäyäshuptikiqa yärakunqantsik Jesucristo pï kanqantapis shumaq tantiyakuyay. Paymi apostolnintsik y mandaq sacerdötintsik kaykan. 2 Wayintaa alli rikananpä Tayta Dios ninqanta Moisés cumplinqannömi† Jesucristupis llapanta cumplirqan. 3 Musyanqantsiknöpis wayi kuyayllapä kaptin manami wayitatsu alabantsik, tsaypa trokinqa wayi ruraqtami. Tsaynöpis manami Moiséstatsu alabantsik, tsaypa trokinqa Jesucristutami. 4 Wayipis runa shäritsiptinrämi kan. Tsaynöllami Tayta Dios kamaptinrä llapanpis kan.5 Tayta Diospa wayinta Moisés alli rikarpis wätaynöllami karqan. Tsaynö karmi shamuq watakunacho Tayta Dios tantiyatsimänantsikpä kaqkunata qellqarqan. 6 Jesucristumi itsanqa Tayta Diospa Tsurin kar wayipa duëñun kaykan. Payman yärakur ninqankunata imaypis cumplirqa noqantsikmi paypa wayin kaykantsik.
Tayta Diosta cäsukur kawanantsikpä ninqan
7 Tsaymi Espíritu Santu ninqanta shumaq tantiyakunantsik. Paymi nin:
“Tayta Dios ninqanta kanan junaq wiyaykarqa 8 tsunyaq jirkacho pruëba kaptin unay castaykikuna chukru shonqu kayanqannö ama kayaytsu.
9 Tsaychömi chusku chunka (40) wata yanapanqäta rikaykarpis paykunaqa munayanqanta ruratsimayta munayarqan.
10 Tsaymi pasaypa ajanar nirqä:
‘Kay runakunaqa oqrakashqanömi kaykäyan.
Yätsinqätapis manami cäsukuyantsu’.
11 Tsaynö ajanarmi jurar nirqä:
‘Paykunaqa awninqä jamayman manami yaykuyanqatsu’ ”.†
12 Wawqikuna panikuna, paqtä qamkunapis chukru shonqu y mana yärakuq kar imayyaqpis kawaq Tayta Diospita witikuyankiman. 13 Tsaypa trokinqa qoyay qoyay jukniki juknikipis shakyätsinakuyay Tayta Dios munanqannö kawayänaykipä. Tsaynöpami jutsa ruray mana engañashuptiki shonquykikuna chukruyanqatsu.
14 Wanunqantsikyaq Tayta Diosman yärakur pay munanqannö kawarmi Jesucristo herenciata chaskinqannö noqantsikpis herenciata chaskishun. 15 Tayta Diospa palabranchömi nin: “Tayta Dios ninqanta kanan junaq wiyaykarqa unay castaykikuna chukru shonqu kayanqannö ama kayaytsu”.†
16 Tantiyakuyay. ¿Pikunatä Tayta Dios ninqanta wiyaykarpis contran shäriyarqan? ¿Manaku paykuna Egiptupita Moisés jipimunqan Israel runakuna kayarqan? 17 ¿Pikunatä chusku chunka (40) wata Tayta Diosta ajanätsiyarqan? ¿Manaku paykuna tsunyaq jirkacho Tayta Dios ushakätsinqan jutsa ruraq runakuna kayarqan? 18 ¿Pikunatatä Tayta Dios jurar nirqan awninqan jamayman mana yaykuyänanpä?† ¿Manaku payta mana cäsukuq runakuna kayarqan? 19 Paykunaqa mana yärakuq kayanqanpitami yaykuyarqantsu.