Jesucristupa willakuyninta cäsukunantsikpä ninqan
2
Angelkunapitapis Jesucristo mas munayyuq kaykaptinqa willakuyninta wiyanqantsikkunata shumaq cäsukushun. Mana cäsukurqa mana allitapis rurashwanmi. 2 Angelkuna apayämunqan leykunata† mana cäsukuq runakunatapis Tayta Dios castigaykaptinqa 3 ¡imanöparä castïgunpita qeshpishun salvamänantsikpä kaq willakuyta mana cäsukushqa!Tsay willakuytami Señor Jesucristo ñöpata willakurqan. Tsaypitanami willakunqanta wiyaqkuna noqantsikta willamashqantsik. 4 Willakuynin rasunpaypa kanqanta Tayta Dios musyatsimashqantsik señalkunata y almiraypä milagrukunata rurarmi. Tsaynöpis musyatsimashqantsik Espíritu Santuwan yachaykunata kikin munanqannö qaramarnintsikmi.†
Jesucristo yanapamanqantsik
5 Mushuq patsata manami angelkunapa makinmantsu Tayta Dios churashqa, tsaypa trokinqa Jesucristupa makinmanmi. 6 Tsaymi palabrancho nin:
¿Imanatä runa kaykan tsayjinanpa paypä yarpachakunaykipä?
¿Imanatä runa kaykan pasaypa kuyanaykipä?
7 Runata kamashqayki cäsi angelnö munayyuq kananpämi.a
Reytanömi churashqayki munayyuq y respitashqa kananpä.
[Llapan kamanqaykitapis munayninmanmi churashqayki.]
8 Kay patsacho kaqkunataqa llapantami makinman churashqayki.†
Makinman llapanta churanqanta niptinpis manarämi rikantsikrätsu runapa munaynincho llapan kanqanta. 9 Tsayta manarä rikarpis y Jesucristo kay patsacho kanqanyaq angelkunapita ichiklla munayyuq kaykaptinpis musyantsikmi munayyuq y respitashqana kananpä Tayta Dios payta churanqanta. Llapan runakunata salvananpä wanunqanpitami Tayta Dios kuyapäkuq kar payta tsaynö churarqan.† 10 Jesucristo salvamaqnintsik kananta munarmi llapantapis kamaq y llapanpä munayyuq Tayta Dios payta kachamurqan noqantsik raykuq ñakar wanunanpä. Tsaynöpami wamrankunata salvar gloriaman pushanqa.
11 Tsaymi runakunata salvaq Jesúspis y salvanqan kaqkunapis tsay Taytallana kantsik. Tsay Taytalla karmi salvanqan kaqkunata mana penqakuypa Jesucristo nimantsik wawqinkuna y paninkuna kanqantsikta. 12 Tayta Diospa palabranchömi Jesucristo nin:
“Salvakuq kanqaykitami wawqïkunata willashä.
Paykunawan qorikaykurmi qamta alabashayki”.†
13 Mastapis ninmi: “Noqaqa payllamanmi yärakushä”.†
Tsaynöpis nin: “Tayta Dios qaramanqan wamräkunawanmi kaycho kaykä”.†
14 Diospa wamrankuna ushakaqlla kayaptinmi Jesucristupis noqantsiknö yurirqan y noqantsiknö wanurqan. Tsaynö wanurmi wanuypä munayyuq diabluta vincirqan. 15 Tsaynöpami jipimashqantsik wanuyta mantsar kawanqantsikpita. Kananqa wanuytapis manami mantsantsiknatsu.
16 Jesucristuqa manami angelkunata yanapananpätsu shamurqan, tsaypa trokinqa Abraham casta kaqkunata yanapananpämi. 17 Yanapamänantsikpämi noqantsiknölla kay patsacho runa karqan. Tsaynöpami Tayta Diospa ñöpancho kuyapäkuq y llapantapis cumpliq mandaq sacerdöti kayman charqan. Paymi sacrificiu kashqa jutsantsikkunapita Tayta Dios perdonamänantsikpä. 18 Jesucristutapis Satanás tentar ñakatsishqa kaptinmi noqantsiktapis tentamashqa Jesucristo yanapamäshun.