Hebreos 1

Hebreos

Libru qallaykunan

Ñöpataqa profëtankunawanmi Tayta Dios kutin kutin unay castantsikkunata imaykanöpa parlaparqan. 2 Kay ushanan tiempuchönami itsanqa Tsurin Jesucristuwanna willakuyninta willamantsik. Paywanmi kay patsatapis ciëlutapis kamarqan. Paytami churarqan llapantapis munaynincho tsararänanpä. 3 Jesucristumi musyatsimantsik Tayta Dios imanö kanqanta. Payta reqirqa kikin Tayta Diostapis reqintsikmi.^† Munayyuq palabranwanmi llapan kamanqankunatapis mandan munanqannö kayänanpä. Jutsantsikpita purificashqa kanantsikpä wanurmi gloriaman kutirqan. Kananqa Tayta Diospa trönun derëchanchömi jamaraykan.

Angelkunapitapis Jesucristo mas munayyuq kanqan

4 Tsaynö karmi Tayta Diospa Tsurin Jesucristo llapan angelkunapitapis mas munayyuq kaykan. Tsaynöllami jutinpis angelkunapa jutinpita mas respitashqa kaykan.^a 5 Tayta Diosqa manami imaypis angelkunata nirqantsu:

“Qamqa tsurïmi kanki.

Kanan junaqpitami taytayki kä”.^b ^†

Tsaynöllami mastapis Tayta Dios nirqan:

“Noqami paypa taytan kashä.

Paynami noqapa tsurï kanqa”.^†

6 Tsaynöllami japallan Tsurinta kay patsaman kachamur Tayta Dios nirqan: “Llapan angelkunapis payta adorayätsun”.^†

7 Angelkunapämi Tayta Dios nirqan:

“Angelnïkunata wayratanömi kachä.

Sirvimaqnïkuna karmi lunyaypa lunyar rupaykaq ninanö kaykäyan”.^†

8 Tsurinpämi itsanqa nirqan:

“Tayta Dios, trönuykichömi imayyaqpis mandaq kaykanki.

Qamqa llapantapis allimi mandanki.

9 Pipis allita ruraptinqa kushikunkimi.

Mana allita ruraptinqa ajanankimi.

Tsaymi Tayta Dios qamta churashushqayki pïmaypitapis mas kushishqa kanaykipä”.^†

10 Tsaynöllami Tsurinpä nirqan:

“Tayta Dios, qammi kamanqayki höra kay patsatapis shumaq takyätsishqayki.

Ciëlutapis makikiwanmi kamashqayki.

11 Llapan kamanqayki ushakaptinpis qamqa imaypis kaykankimi.

Latsapa makwayaqnömi llapanpis ushakanqa.

12 Mantuta doblaqnömi kamanqaykikunatapis doblanki.

Latsapata trukatsiqnöllami trukatsinki.

Llapan ushakaptinpis qamqa imaypis kanqaykinöllami kaykanki.

Qamqa manami imaypis awkinyankitsu”.^†

13 Manami mayqan angelkunatapis Tayta Dios nirqantsu: “Derëchäman jamakamuy llapan chikishuqnikikunata munaynikiman churanqäyaq”.^†

14 Tsaymi angelkunaqa Tayta Diospa manduncho kayan. Paykunatami Tayta Dios kachamun salvashqa kaqkunata yanapananpä.^†