3 Tayta Diosman yärakurqa kay patsatapis ciëlutapis ninqallanwan kamanqantami tantiyantsik. Llapan rikanqantsiktapis mana kaqpitami kamarqan.^†

4 Abelpis Tayta Diosman yärakurmi wawqin Caínpita mas allinnin kaq sacrificiuta Tayta Diospä rupatsirqan. Abel rupatsinqanta chaskirmi Tayta Dios musyatsirqan alli runa kanqanta.^† Abel unayna ushakashqa kaykaptinpis ruranqantami kananyaqpis yarpantsik.

5 Enoctapis Tayta Diosman yärakuptinmi kawaykaqta Tayta Dios pushakurqan. Tayta Diospa palabranchömi nin Tayta Dios munanqannö Enoc kawanqanta.^†

6 Yärakuynintsik mana kaptinqa manami imanöpapis Tayta Dios munanqannö kawashuntsu. Tayta Diosman yärakuykarqa pay kanqanta criyishun. Tsaynöpis criyishun payta ashiqkunata yanapanqanta.

7 Noépis Tayta Diosman yärakurmi arcata rurarqan diluviupita tsurinkunawan y llumtsuyninkunawan salvakuyänanpä. Diluviu kananpä kanqanta Tayta Dios willaptinmi diluviuta manarä rikarpis arcata rurarqan. Tsaymi mana yärakuq runakunata Tayta Dios ushakätsirpis Noéta salvar jutsaynaqta chaskirqan.^†

8 Abrahampis Tayta Diosman yärakurmi markanta jaqiskir Tayta Dios rikatsinanpä kaq nacionman aywakurqan. Tsaymi may nacionman chänanpä kanqantapis mana musyaykar Tayta Dios ninqannö aywakurqan.^† 9 Tayta Dios awninqan nacionman charpis payman yärakurmi toldukunallacho jäpa runanölla tarqan. Abrahamtanö Tayta Dios awniptinmi Isaacpis y Jacobpis tsaynölla täyarqan. 10 Abraham tsaynö tarqan Tayta Dios shäritsinqan mana ushakaq markaman chänanpä kanqanta musyarmi.^†

11 Sarapis Tayta Diosman yärakurmi chakwanyanqanyaq qolluq kaykarpis qeshyaq rikakurqan. Payqa Tayta Dios awninqanta cumplinanpä kanqantami criyirqan.^† 12 Tsaynöpami Abraham pasaypa awkinna kaykaptinpis tsurin yurirqan. Tsaypitanami paypa tsurin y tsurinpita aywaraqkunapis jatun nación kanqanyaq mirayarqan. Paykunami yupaytapis mana atipaypä qoyllurnörä y lamar kuchuncho aqushanörä atskaq kaykäyan.^†

13 Tayta Dios awninqanta manarä chaskirpis Abraham, Sara, Isaac y Jacob payman yärakuykällarmi wanuyarqan. Manarä chaskirpis Tayta Dios cumpliykanqanta rikarmi kushikuyarqan. Paykunaqa kay patsacho qorpanölla kayanqantami tantiyayarqan.^† 14 Tsaynö tantiyarmi ciëlucho kaykaq markaman aywakuyänanpä shuyaräyarqan. 15 Paykunaqa unay täyanqan markaman kutiyta manami yarpäyarqantsu. Markanpä llakirqa imaykanöpapis kutiyanmanmi karqan. 16 Markanpä llakikuyänanpa trokinqa ciëlucho kaykaq mas alli kaq markapämi yarparäyarqan. Tsaymi paykunapa Diosnin kayta Tayta Dios penqakuntsu. Tsay markataqa kamarishqallatanami paykunata shuyaraykätsin.

17 Abrahampis Tayta Diosman yärakurmi japallan tsurin Isaacta altarcho rupatsinanpä Tayta Dios niptin rupatsinanpä pusharqan.^† 18 Tsaynö pusharqan Isaacpita atskaman mirananpä Tayta Dios awnishqa kaykaptinmi.^† 19 Tsaymi yarparqan wanutsiptinpis Isaacta kawaritsimunanpä kanqanta. Rasunpaypa kawarimushqatanömi Abraham payta chaskirqan.^†

20 Isaacpis Tayta Diosman yärakurmi Jacobta y Esaúta bendicionninta qorqan.^†

21 Jacobpis Tayta Diosman yärakurmi Josépa tsurinkunata bendicionninta qorqan. Wanunanpäna kaykar bendicionninta qormi tukrunman tukmakuykur Tayta Diosta adorarqan.^†

22 Josépis Tayta Diosman yärakurmi Israel mayinkunata willarqan Egiptupita yarquyänanpä kayanqanta. Wanunanpäna kanqanta musyarmi paykunata nirqan: “Kaypita aywakur tullükunatapis apakurkur aywakuyanki”.^†

23 Moiséspa mamanpis taytanpis Tayta Diosman yärakurmi Faraón mandanqanta wiyakuyarqantsu. Tsaymi Moisés yuriptin kuyayllapä kanqanta rikaykur kimsa killantin pakarätsikuyarqan.^†

24 Moiséspis Tayta Diosman yärakurmi poqukaskirnin Faraónpa warmi tsurinpa wamran^† kayta munarqantsu. 25 Tsaymi Faraónpa wayincho jutsata rurar kawananpa trokin Israel mayinkunawan ñakar kawarqan. 26 Tayta Diospita premiuta chaskinanpä kanqanta musyarmi Egiptucho imaykayuq kayta munarqantsu, tsaypa trokinqa Cristo raykuq ñakanqan mas alli kanqantami tantiyarqan.

27 Tayta Diosman Moisés yärakurmi Faraónta mana mantsaypa Tayta Diosta rikaykaqnö Egiptupita aywakurqan. 28 Tayta Diosman yärakurmi Israel runakunata nirqan Pascua fiestata rurar punkupa marcunkunata yawarwan llushiyänanpä. Tsaynö llushitsirqan wanutsikuq ángel yawarta rikar Israel runakunapa wayinkunacho mayor tsurinkunata mana wanutsinanpämi.^†

29 Israel runakunapis Tayta Diosman yärakurmi Puka Lamar tsakishqallapa tsimpayarqan. Egipto runakunami itsanqa qepanta yaykuyanqancho shenqaypa wanuyarqan.^†

30 Tayta Diosman yärakur Israel runakuna Jericó markata qanchis junaq tumapaykäyaptinmi murällanpis juchurqan.^†

31 Prostitüta Rahabpis Tayta Diosman yärakurmi rikapakuq Israel runakunata kushishqa chaskirqan.^† Tsaynöpami mana cäsukuq runakuna ushakäyaptinpis payqa ushakarqantsu.^†

32 Tayta Diosman yärakuqkunaqa maspis kayanrämi. Itsanqa tiempumi kantsu Gedeónpä,^† Baracpä,^† Sansónpä,^† Jeftépä,^† Davidpä,^† Samuelpä^† y profëtakunapä willakunäpä. 33 Tayta Diosman yärakurmi wakinqa nacionkunata vinciyarqan, wakinqa runakunata alli juzgayarqan y wakinnami Tayta Dios awninqanta chaskiyarqan. Wakintaqa leonkunapis manami mikuyarqantsu.^† 34 Wakintaqa ninapis manami ruparqantsu.^† Wakinnami espädawan wanutsishqa kayänanpä kaykaptinpis qeshpiyarqan. Kallpaynaqkunatapis kallpankuna yurinanpämi Tayta Dios yanaparqan. Tsaymi juk nacionpita shamuq soldädukunatapis Tayta Diosman yärakur vinciyarqan. 35 Tsaynöllami Tayta Diosman yärakuq warmikunapis rikayarqan wanushqa sutaraykaq wamrankuna kawariyämunqanta.^†

Wakintanami ñakatsiypa wanutsiyarqan. Tayta Diosta ñëgatsiyänan raykuq ñakatsiyaptinpis Tayta Dios kawaritsimunanpä kanqanta musyarmi ñëgayarqantsu. 36 Tsaynöllami wakinpis ñakayarqan runakuna ashlliyaptin, castigayaptin^† y carcelman wichqayaptin.^† 37 Wakintami saqmaypa wanutsiyarqan.^† Wakintami serruchuwan roquypa wanutsiyarqan. Wakintanami espädawan wanutsiyarqan.^† Wakinnami pasaypa muchuq kar üsha qaratsallapita y cabra qarallapita latsapankuna jatishqa markan markan chikishqa puriyarqan. 38 Runakuna chikiyaptinmi tsunyaq jirkakunapa y raqrakunapa purir machaykunaman pakakuyaq. Tayta Diosman mana yärakuqkunaqa manami mayqanpis paykunanö alli kayarqantsu.

39 Yärakuyanqanpita Tayta Dios paykunata alli rikaptinpis kay patsacho manami mayqanpis Tayta Dios awninqanta chaskiyarqantsu. 40 Tsaypa trokinqa mas alli kaqta chaskiyänantami Tayta Dios munarqan. Tsaynöpami paykunapis y noqantsikpis awninqan salvacionta iwal chaskishun.